Maha Kumbh 2025: ତ୍ରିବେଣୀ ସଙ୍ଗମରେ ବୁଡ ପକାଇଲେଣି ୧୦ କୋଟିରୁ ଅଧିକ ଶ୍ରଦ୍ଧାଳୁ, ବଢୁଛି ଭକ୍ତଙ୍କ ସଂଖ୍ୟା

Updated: Thursday, January 23, 2025, 17:28 [IST]

Maha Kumbh 2025: ବିଶ୍ୱର ସବୁଠାରୁ ବଡ଼ ଧାର୍ମିକ ମେଳା ମହାକୁମ୍ଭ । ୨୦୨୫ ମହାକୁମ୍ଭରେ ଦେଶ ବିଦେଶରୁ ପ୍ରାୟ ୪୫ କୋଟିରୁ ଅଧିକ ଲୋକଙ୍କ ସମାଗମ ହେବ ବୋଲି ଆଶା କରାଯାଉଥିଲା ଏହାରି ମଧ୍ୟରେ ଏପର୍ଯ୍ୟନ୍ତ ପ୍ରାୟ ୧୦ କୋଟିରୁ ଅଧିକ ଶ୍ରଦ୍ଧାଳୁ ତ୍ରିବେଣୀ ସଙ୍ଗମରେ ବୁଡ଼ ପକାଇ ସାରିଥିବା ନେଇ ଚର୍ଚ୍ଚା ହେଉଛି । ଗୁରୁବାର ଦିନ ଉତ୍ତର ପ୍ରଦେଶ ସରକାରଙ୍କ ପକ୍ଷରୁ ଏନେଇ ସୂଚନା ଜାରି କରାଯାଇଛି । ତେବେ ଗୁରୁବାର ଦିନ ୧୨ଟା ପର୍ଯ୍ୟନ୍ତ ପବିତ୍ର ବୁଡ଼ ପକାଇବା ପାଇଁ ୧୦ କୋଟି ଭକ୍ତଙ୍କ ସଂଖ୍ୟା ଅତିକ୍ରମ କରିଛି ।

ସରକାରୀ ସୂଚନା ଅନୁସାରେ, ଭକ୍ତଙ୍କ ସଂଖ୍ୟା କ୍ରମାଗତ ବୃଦ୍ଧି ପାଇବାରେ ଲାଗିଛି, ପ୍ରତିଦିନ ଲକ୍ଷ ଲକ୍ଷ ଲୋକ ବୁଡ଼ ପକାଇବା ପାଇଁ ସଙ୍ଗମରେ ପହଞ୍ଚୁଛନ୍ତି। ସ୍ନାନ ଉତ୍ସବ ସମୟରେ ଏହି ସଂଖ୍ୟା କୋଟି କୋଟିରେ ପହଞ୍ଚିଥାଏ। ଉତ୍ତର ପ୍ରଦେଶ ସରକାରଙ୍କ ଆକଳନ ଅନୁଯାୟୀ, ଏଥର ମହାକୁମ୍ଭରେ ୪୫ କୋଟିରୁ ଅଧିକ ଲୋକ ବୁଡ଼ ପକାଇବେ।

ଏକ ବିବୃତ୍ତି ଅନୁଯାୟୀ, "କେବଳ ଗୁରୁବାର ଦିନ, ମଧ୍ୟାହ୍ନ 12ଟା ପର୍ଯ୍ୟନ୍ତ, 30 ଲକ୍ଷ ଲୋକ ତ୍ରିବେଣୀ ସଙ୍ଗମରେ ବୁଡ଼ ପକାଇଛନ୍ତି । ଯେଉଁଥିରେ କଳ୍ପବାସୀ ଏବଂ ବିଦେଶରୁ ଆସିଥିବା ଭକ୍ତ ଏବଂ ସନ୍ଥ ସାମିଲ ଅଛନ୍ତି । ସ୍ନାନ କରୁଥିବା ଶ୍ରଦ୍ଧାଳୁଙ୍କ ସଂଖ୍ୟା 10 କୋଟି ଅତିକ୍ରମ କରିଛି । ମକର ସଂକ୍ରାନ୍ତିରେ ସର୍ବାଧିକ ସଂଖ୍ୟକ, ପ୍ରାୟ 3.5 କୋଟି ଭକ୍ତ ସ୍ନାନ କରିଥିଲେ, ଯେତେବେଳେ ପୌଷ ପୂର୍ଣ୍ଣିମାରେ 1.7 କୋଟିରୁ ଅଧିକ ଶ୍ରଦ୍ଧାଳୁ ବୁଡ଼ ପକାଇଥିଲେ ।

ଭାରତ ଏବଂ ବିଦେଶରୁ ମହାକୁମ୍ଭକୁ ଆସୁଥିବା ଭକ୍ତଙ୍କ ସଂଖ୍ୟା ନିରନ୍ତର ବୃଦ୍ଧି ପାଇବାରେ ଲାଗିଛି । ଆଶା କରାଯାଉଛି ଯେ ବାକି ରାଜକୀୟ ସ୍ନାନ ପାଇଁ ମଧ୍ୟ ଭକ୍ତମାନଙ୍କର ଭିଡ଼ ବଢିବ । ତେବେ ଶ୍ରଦ୍ଧାଳୁଙ୍କ ଭିଡ଼କୁ ଦୃଷ୍ଟିରେ ରଖି ସରକାରଙ୍କ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । ସୁରକ୍ଷା ବ୍ୟବସ୍ଥା ମଧ୍ୟ କଡ଼ା କଡି କରାଯାଇଛି । ସେହିପରି ଘାଟ ସଂଖ୍ୟା ମଧ୍ୟ ବୃଦ୍ଧି କରାଯାଉଛି ।

କୁମ୍ଭମେଳାର ପୌରାଣିକ କଥା

ସମୁଦ୍ରମନ୍ଥନ ସମୟରେ ଅମୃତ ନେବା ପାଇଁ ଦେବତା ଏବଂ ରାକ୍ଷସମାନଙ୍କ ମଧ୍ୟରେ ୧୨ ଦିନ ଧରି ଲଗାତାର ଯୁଦ୍ଧ ଲାଗିଥିଲା। ବିଶ୍ଵାସ ରହିଛି ଦେବତାମାନଙ୍କ ୧୨ ଦିନ ମଣିଷଙ୍କ ପାଇଁ ୧୨ ବର୍ଷ ସଙ୍ଗେ ସମାନ। ସେଥିପାଇଁ ୧୨ଟି କୁମ୍ଭ ହୋଇଥାଏ। ଏଥିରୁ ୪ଟି କୁମ୍ଭ ପୃ‌ଥିବୀରେ ପାଳନ କରାଯାଇଥାଏ ଏବଂ ୮ଟି କୁମ୍ଭ ଦେବଲୋକରେ ହୋଇଥାଏ।