ପରିସ୍ରା ଅଧିକ ସମୟ ରୋକି ରଖିବା କାହିଁକି ବିପଜ୍ଜନକ? UTI ଠାରୁ କିଡ଼ନୀ କ୍ଷତି ପର୍ଯ୍ୟନ୍ତ ହୋଇପାରେ ବଡ଼ ସମସ୍ୟା

ଦୀର୍ଘ ସମୟର ବୈଠକ, ଯାତ୍ରା ଅବା ଆଖପାଖରେ ପରିଚ୍ଛନ୍ନ ଶୌଚାଳୟ ନଥିବା ଯୋଗୁଁ ଅନେକ ଲୋକ ଘଣ୍ଟା ଘଣ୍ଟା ଧରି ପରିସ୍ରା ରୋକି ରଖନ୍ତି। ଏହି ଅଭ୍ୟାସ ଆପଣଙ୍କ ସ୍ୱାସ୍ଥ୍ୟ ପାଇଁ ଅତ୍ୟନ୍ତ କ୍ଷତିକାରକ ହୋଇପାରେ। ବାରମ୍ବାର ପରିସ୍ରା ରୋକିବା ଯୋଗୁଁ ମୂତ୍ରାଶୟ ସଂକ୍ରମଣ (UTI) ଠାରୁ ଆରମ୍ଭ କରି କିଡ଼ନୀ କ୍ଷତି ପର୍ଯ୍ୟନ୍ତ ଗମ୍ଭୀର ସମସ୍ୟା ଦେଖାଦେଇପାରେ। ଆସନ୍ତୁ ଜାଣିବା କାହିଁକି ଏହା ବିପଜ୍ଜନକ ଏବଂ କ'ଣ ହୋଇପାରେ ଏହାର ପରିଣାମ।

ମୂତ୍ରାଶୟ ସଂକ୍ରମଣ (UTI) ର ବିପଦ:
ଦୀର୍ଘ ସମୟ ପରିସ୍ରା ରୋକିବା ଯୋଗୁଁ ମୂତ୍ରନାଳୀରେ ବ୍ୟାକ୍ଟେରିଆ ବଢ଼ିବାକୁ ସୁଯୋଗ ମିଳେ। ଏହା ମୂତ୍ରାଶୟ ସଂକ୍ରମଣ (UTI) ର କାରଣ ହୋଇପାରେ। ଯଦି ସମୟମତେ ଚିକିତ୍ସା ନ ହୁଏ, ଏହି ସଂକ୍ରମଣ କିଡ଼ନୀ ପର୍ଯ୍ୟନ୍ତ ପହଞ୍ଚି ଗମ୍ଭୀର ସ୍ୱାସ୍ଥ୍ୟ ସମସ୍ୟା ସୃଷ୍ଟି କରିପାରେ।

ମୂତ୍ରାଶୟର ମାଂସପେଶୀ ଦୁର୍ବଳ ହେବା:
ବାରମ୍ବାର ଅଧିକ ପରିମାଣରେ ପରିସ୍ରା ରୋକିବା ଯୋଗୁଁ ମୂତ୍ରାଶୟର ମାଂସପେଶୀ ଅତ୍ୟଧିକ ଖିଞ୍ଚି ହୁଏ। ଦୀର୍ଘମିଆଦୀ ଏହି ଅଭ୍ୟାସ ମାଂସପେଶୀକୁ ଦୁର୍ବଳ କରିଦେଇପାରେ, ଯାହା ଫଳରେ ପରିସ୍ରା ସମ୍ପୂର୍ଣ୍ଣ ରୂପେ ଖାଲି ନ ହେବା,ପରିସ୍ରା ଟପକିବା କିମ୍ବା ବାରମ୍ବାର କ୍ୟାଥେଟର ବ୍ୟବହାରର ଆବଶ୍ୟକତା ଦେଖାଦେଇପାରେ।

ଯନ୍ତ୍ରଣା ଓ ଅସୁବିଧା:
ଏକ ସାଧାରଣ ବ୍ୟକ୍ତିଙ୍କ ମୂତ୍ରାଶୟରେ ପ୍ରାୟ ୩୦୦ ରୁ ୫୦୦ ମିଲିଲିଟର ପରିସ୍ରା ଧାରଣ କରିବାର କ୍ଷମତା ଥାଏ। ଏହାଠାରୁ ଅଧିକ ପରିସ୍ରା ଜମା ହେଲେ ପେଟର ନିମ୍ନ ଭାଗରେ ଯନ୍ତ୍ରଣା, ଅସୁବିଧା, ଚିଡ଼ଚିଡ଼ା ଭାବ ଏବଂ ଏକାଗ୍ରତାରେ ଅସୁବିଧା ଭଳି ସମସ୍ୟା ଦେଖାଦେଇପାରେ।

ମୂତ୍ରାଶୟ ପଥର ବା କିଡ଼ନୀ ଷ୍ଟୋନର ବିପଦ:
ଦୀର୍ଘ ସମୟ ପରିସ୍ରା ମୂତ୍ରାଶୟରେ ରହିଲେ, ତାହା ମଧ୍ୟରେ ଥିବା ଖଣିଜ ପଦାର୍ଥ (ମିନେରାଲ୍ସ) ଧୀରେ ଧୀରେ ଜମା ହୋଇ ପଥରୀର ରୂପ ନେଇପାରେ। ଏହି ପଥରୀ ଆପଣଙ୍କ ସ୍ୱାସ୍ଥ୍ୟ ପାଇଁ ଆହୁରି ବିପଜ୍ଜନକ ହୋଇପାରେ।

କିଡ଼ନୀ କ୍ଷତିର ଆଶଙ୍କା:
ବାରମ୍ବାର ପରିସ୍ରା ରୋକିବା ଯୋଗୁଁ ମୂତ୍ର ପଛକୁ କିଡ଼ନୀ ଆଡ଼କୁ ଫେରିଯାଇପାରେ, ଯାହାକୁ ଚିକିତ୍ସା ଭାଷାରେ "ରିଫ୍ଲକ୍ସ" କୁହାଯାଏ। ଏହା ଦୀର୍ଘମିଆଦୀ କିଡ଼ନୀକୁ ସ୍ଥାୟୀ କ୍ଷତି ପହଞ୍ଚାଇପାରେ। ବିଶେଷଜ୍ଞମାନେ ପରାମର୍ଶ ଦେଇଛନ୍ତି ଯେ ପ୍ରାକୃତିକ ଭାବେ ପରିସ୍ରା ଆସିଲେ ପ୍ରତି ୩ ରୁ ୪ ଘଣ୍ଟାରେ ଏକଥା ରୋକିବା ଉଚିତ ନୁହେ। ତେବେ, ବ୍ୟକ୍ତିଙ୍କ ବୟସ, ଜଳ ପାନ ପରିମାଣ ଏବଂ ମୂତ୍ରାଶୟର କ୍ଷମତା ଅନୁଯାୟୀ ଏହି ସମୟ କିଛି କମବେଶି ହୋଇପାରେ।

ରୋକଥାମ ପାଇଁ ଉପାୟ:
ବିଶେଷଜ୍ଞମାନେ ଏହି ସମସ୍ୟାଗୁଡ଼ିକରୁ ରକ୍ଷା ପାଇବା ପାଇଁ ନିମ୍ନଲିଖିତ ପରାମର୍ଶ ଦେଇଛନ୍ତି:

ନିୟମିତ ପରିସ୍ରା: ପ୍ରାକୃତିକ ଭାବେ ପରିସ୍ରା ଆସିଲେ ତୁରନ୍ତ ଶୌଚାଳୟକୁ ଯାଆନ୍ତୁ। ପ୍ରତି ୩-୪ ଘଣ୍ଟାରେ ପରିସ୍ରା କରିବା ଅଭ୍ୟାସ କରନ୍ତୁ।
ପର୍ଯ୍ୟାପ୍ତ ଜଳ ପାନ: ଦିନକୁ ୨-୩ ଲିଟର ପାଣି ପିଅନ୍ତୁ, ଯାହା ମୂତ୍ରାଶୟକୁ ସଫା ରଖିବାରେ ସାହାଯ୍ୟ କରେ।
ପରିଚ୍ଛନ୍ନତା: ଶୌଚାଳୟ ବ୍ୟବହାର ପୂର୍ବରୁ ଓ ପରେ ପରିଚ୍ଛନ୍ନତାର ଧ୍ୟାନ ରଖନ୍ତୁ ଯାହା ସଂକ୍ରମଣର ବିପଦ ହ୍ରାସ କରେ।
ସ୍ୱାସ୍ଥ୍ୟକର ଜୀବନଶୈଳୀ: ସୁଷମ ଖାଦ୍ୟ ଓ ନିୟମିତ ବ୍ୟାୟାମ ମୂତ୍ରାଶୟ ଓ କିଡ଼ନୀର ସ୍ୱାସ୍ଥ୍ୟ ବଜାୟ ରଖେ।
ଡାକ୍ତରୀ ପରାମର୍ଶ: ଯଦି ପରିସ୍ରା କରିବାରେ ଯନ୍ତ୍ରଣା, ଅସୁବିଧା କିମ୍ବା ଅନ୍ୟ ଲକ୍ଷଣ ଦେଖାଦେଉଛି, ତୁରନ୍ତ ଡାକ୍ତରଙ୍କ ସହ ପରାମର୍ଶ କରନ୍ତୁ।