ଦୀପାବଳୀର ପ୍ରଦୂଷଣ ଭାରି ପଡିପାରେ ଶ୍ବାସରୋଗୀଙ୍କ ଉପରେ, ରୁହନ୍ତୁ ସାବଧାନ

ଦୀପାବଳି ଖୁସିର ପର୍ବ। କିନ୍ତୁ ଏକ ଆନନ୍ଦଦାୟକ ଅବସର ଆସ୍ଥମା ପରି ଶ୍ୱାସକ୍ରିୟା ସମସ୍ୟା ଥିବା ରୋଗୀଙ୍କ ପାଇଁ ହୋଇପାରେ ଚ୍ୟାଲେଞ୍ଜିଂ । ଜାଣନ୍ତୁ କିପରି ଏଥିରୁ ରହିବେ ସତର୍କ ....

Published: Saturday, October 22, 2022, 20:47 [IST]

ନୂଆଦିଲ୍ଲୀ: ଆଉ ଗୋଟିଏ ଦିନ ପରେ ଆଲୋକର ପର୍ବ ଦୀପାବଳୀ । କରୋନା ଯୋଗୁଁ ପ୍ରାୟ ସମସ୍ତ ପର୍ବ ପର୍ବାଣୀ ଉପରେ ଏକ ପ୍ରକାର ରୋକ ଲାଗିଥିବା ବେଳେ ଚଳିତ ଥର ଲୋକେ ଏକାଠି ହୋଇ ଏହି ପର୍ବ ପାଳନ ନେଇ ଅଛନ୍ତି ଉତ୍ସାହିତ । ବିଭିନ୍ନ ପ୍ରକାର ଦୀପରେ ଚାଲିଛି ଘର ସଜା, ରଙ୍ଗୀନ ଲାଇଟ ସହିତ ଫୁଲରେ ଅନେକ ନିଜର ଘରର ଶୋଭା ବଢେଇବା ପାଇଁ ସଜାଇଛନ୍ତି । ତେବେ ଦୀପାବଳୀରେ ବାଣ ଫୁଟାଇବା ଶ୍ବାସ ରୋଗୀଙ୍କ ପାଇଁ ଭାରି ପଡିପାରେ । ଏହି ରୋଗୀମାନେ ବିଶେଷ ସତର୍କ ରହିବାର ଆବଶ୍ୟକତା ରହିଛି ।

ବାଣ ଫୁଟିବା ପରେ ବାୟୁ ପ୍ରଦୂଷଣ ହୋଇଥାଏ । ଫଳରେ ଏହି ରୋଗୀଙ୍କୁ ଶ୍ବାସପ୍ରଶ୍ବାସ ନେବାରେ ସମସ୍ୟା ସୃଷ୍ଟି ହୋଇଥାଏ । ଏମାନେ ଅନେକ କଷ୍ଟ ଭୋଗିଥାନ୍ତି । ଏପରି ସ୍ଥିତିରେ ଉଭୟ ବୟସ୍କ ଏବଂ ଛୋଟପିଲା ଥିବା ଶ୍ବାସ ରୋଗୀଙ୍କୁ ବେଶୀ ଚଲାବୁଲା କରିବା ସହିତ ରାତିରେ ଶୋଇବାରେ ମଧ୍ୟ ସମସ୍ୟା ହୋଇଥାଏ । ଛାତି ଭରିଯିବା ପରି ଲାଗିବା ସହିତ ଥକ୍କା ଅନୁଭବ କରିଥାନ୍ତି।

ଦୀପାବଳୀରେ ଦେଶର ବାୟୁର ଗୁଣମାନ ସବୁଠୁ ଖରାପ ରହିଥାଏ। ଏଥିରେ ଭରି ରହିଥାଏ ହାନୀକାରକ ଗ୍ୟାସ । ଫୁସଫୁସରେ ଅଧିକ ସମସ୍ୟା ଦେଖାଦେବା ଫଳରେ ରୋଗୀ ସହଜ ମନେ କରିନଥାଏ । ତେଣୁ ଯଦି ଆପଣଙ୍କ ଘରେ କେହି ଛୋଟ ପିଲା କିମ୍ବା ବୟସ୍କ ଶ୍ବାସ ରୋଗରେ ପୀଡିତ । ତେବେ ତାଙ୍କୁ ଘରୁ ବାହାରକୁ ଯିବାକୁ ଅନୁମତି ଦିଅନ୍ତୁ ନାହିଁ। ଛୋଟ ପିଲାଙ୍କୁ ଇନଡୋର ଖେଳରେ ବ୍ୟସ୍ତ ରଖିବା ପାଇଁ ଚେଷ୍ଟା କରନ୍ତୁ। ଯଦି କୌଣସି କାମରେ ବାହାରକୁ ଯାଉଛନ୍ତି ତେବେ ମୁହଁରେ ମାସ୍କ ଲଗାଇବା ପାଇଁ ଚେଷ୍ଟା କରନ୍ତୁ । ପାଖରେ ଇନହେଲର ରଖନ୍ତୁ ।

Published On October 22, 2022