ସାବଧାନ ! ଖାଉଛନ୍ତି କି ଅଧିକ ବ୍ରେଡ, ଆଜି ହିଁ ବଦଳାନ୍ତୁ ଅଭ୍ୟାସ
ଆଜିକାଲି ସକାଳର ଜଳଖିଆରେ ବ୍ରେଡ୍ ଅନେକଙ୍କର ପସନ୍ଦ। ଏହା ସାଙ୍ଗେ ସାଙ୍ଗେ ତିଆରି ହୋଇଯାଏ ଓ ପେଟ ମଧ୍ୟ ଭର୍ତ୍ତି କରେ। କିନ୍ତୁ ନିକଟରେ ଏକ ପ୍ରଶ୍ନ ସାଧାରଣ ଲୋକଙ୍କ ମନରେ ଉଙ୍କି ମାରୁଛି - ବ୍ରେଡ୍ ଖାଇବା ଦ୍ୱାରା କ'ଣ ଲିଭର୍ ଫ୍ୟାଟି ହୋଇପାରେ? ଏହି ପ୍ରଶ୍ନର ଉତ୍ତର ଜାଣିବା ପାଇଁ ଆମେ ଏମ୍ସ (AIIMS) ର ଡାକ୍ତରଙ୍କ ସହ ଆଲୋଚନା କରିଛୁ ।
ଏମ୍ସର ଜଣେ ବରିଷ୍ଠ ଡାକ୍ତରଙ୍କ ମତରେ, ଖାସକରି ସାଦା ବ୍ରେଡ୍ (ମୈଦାରେ ତିଆରି) ଅତ୍ୟଧିକ ପରିମାଣରେ ଖାଇଲେ ଲିଭର୍ ଫ୍ୟାଟି ହେବାର ଆଶଙ୍କା ବଢ଼ିପାରେ। ଏହାର କାରଣ ହେଉଛି ସାଦା ବ୍ରେଡ୍ରେ ଥିବା ରିଫାଇନ୍ଡ କାର୍ବୋହାଇଡ୍ରେଟ୍ ଓ ସୁଗାର, ଯାହା ଶରୀରରେ ପହଞ୍ଚି ଚର୍ବିରେ ରୂପାନ୍ତରିତ ହୋଇ ଲିଭର୍ରେ ଜମା ହୋଇପାରେ। ୨୦୨୦ରେ ପବ୍ମେଡ୍ରେ ପ୍ରକାଶିତ ଏକ ଅଧ୍ୟୟନ ମୁତାବକ, ରିଫାଇନ୍ଡ କାର୍ବର ଅଧିକ ସେବନ ଲିଭର୍ରେ ଚର୍ବି ଜମା ହେବାର କାରଣ ହୋଇପାରେ। ସାଦା ବ୍ରେଡ୍ରେ ମଇଦା ଥାଏ, ଯାହା ଶୀଘ୍ର ଗ୍ଲୁକୋଜ୍ରେ ପରିଣତ ହୁଏ ଏବଂ ଇନସୁଲିନ ରେଜିଷ୍ଟାନ୍ସ ସୃଷ୍ଟି କରି ଲିଭର୍ରେ ଚର୍ବି ଜମା କରାଏ।
ସାଦା ବ୍ରେଡ୍ କାହିଁକି କ୍ଷତିକାରକ?
ଡାଇଟିସିଆନ୍ ପରମଜିତ୍ କୌରଙ୍କ ମତରେ, ସାଦା ବ୍ରେଡ୍ ଅତ୍ୟଧିକ ପ୍ରୋସେସ୍ଡ ହୋଇଥାଏ ଏବଂ ଏଥିରେ ଫାଇବର ପ୍ରାୟ ନାମମାତ୍ର ଥାଏ। ଏହା ଶରୀରରେ ଓଜନ ଓ ରକ୍ତରେ ସୁଗାର ଲେବୁଲ୍ ବଢ଼ାଇପାରେ। ଏହା ବ୍ୟତୀତ, ଏଥିରେ ପୁଷ୍ଟିକର ତତ୍ତ୍ୱ କମ୍ ଥିବାରୁ ଶରୀରକୁ ଆବଶ୍ୟକ ଶକ୍ତି ମିଳେ ନାହିଁ। ତେଣୁ ଏହା ଲିଭର୍ରେ ଚର୍ବି ଜମା ହେବାର ଆଶଙ୍କାକୁ ବଢ଼ାଇଥାଏ।
ବ୍ରାଉନ୍ କିମ୍ବା ମଲ୍ଟିଗ୍ରେନ୍ ବ୍ରେଡ୍ କ'ଣ ଭଲ?
ସାଦା ବ୍ରେଡ୍ ତୁଳନାରେ ବ୍ରାଉନ୍ ବା ମଲ୍ଟିଗ୍ରେନ୍ ବ୍ରେଡ୍ କିଛି ମାତ୍ରାରେ ଭଲ ବିକଳ୍ପ ହୋଇପାରେ, କିନ୍ତୁ ଏହାକୁ ମଧ୍ୟ ସୀମିତ ପରିମାଣରେ ଖାଇବା ଉଚିତ୍। ଏହାରେ ଫାଇବର ଓ ପୁଷ୍ଟିକର ତତ୍ତ୍ୱ ଅଧିକ ଥାଏ, ଯାହା ଲିଭର୍ ଉପରେ କମ୍ ଚାପ ପକାଇଥାଏ। ତେଣୁ, ବ୍ରେଡ୍ ଖାଇବା ଆବଶ୍ୟକ ହେଲେ ଏହି ବିକଳ୍ପ ବାଛନ୍ତୁ, କିନ୍ତୁ ଅତ୍ୟଧିକ ଖାଇବାରୁ ଦୂରେଇ ରୁହନ୍ତୁ।
ବ୍ରେଡ୍ ବଦଳରେ କ'ଣ ଖାଇବା ଉଚିତ୍?
ଡାକ୍ତରମାନେ ପରାମର୍ଶ ଦିଅନ୍ତି ଯେ ବ୍ରେଡ୍ ବଦଳରେ ଓଟ୍ସ, ଦଲିଆ, ଘରୋଇ ରୁଟି, ଫଳ ଓ ଅଣ୍ଡା ଭଳି ଖାଦ୍ୟକୁ ନିଜ ଡାଏଟ୍ରେ ସାମିଲ କରିବା ଉଚିତ୍। ଏହି ଖାଦ୍ୟଗୁଡ଼ିକ ପୁଷ୍ଟିକର ଏବଂ ଲିଭର୍ ସ୍ୱାସ୍ଥ୍ୟ ପାଇଁ ଲାଭଦାୟକ। ଏହା ସହିତ ଅଧିକ ପାଣି ପିଇବା, ସନ୍ତୁଳିତ ଖାଦ୍ୟ ଗ୍ରହଣ କରିବା ଓ ତେଲିଆ ଓ ଜଙ୍କ ଫୁଡ୍ ଏଡ଼ାଇବା ଜରୁରୀ। ନିୟମିତ ବ୍ୟାୟାମ ଓ ଶରାବ ଏବଂ ଧୂମପାନଠାରୁ ଦୂରେଇ ରହିବା ମଧ୍ୟ ଲିଭର୍କୁ ସୁସ୍ଥ ରଖିବାରେ ସାହାଯ୍ୟ କରେ।
ଲିଭର୍ ଫ୍ୟାଟି ହେବାର ଅନ୍ୟ କାରଣ
ବ୍ରେଡ୍ ବ୍ୟତୀତ ଅନ୍ୟ କାରଣ ଯେମିତି ମୋଟାପଣ, ଡାଇବେଟିସ୍, ଉଚ୍ଚ କୋଲେଷ୍ଟେରଲ, ଅତ୍ୟଧିକ ଶରାବ ସେବନ ଓ ଅନିୟମିତ ଜୀବନଶୈଳୀ ମଧ୍ୟ ଲିଭର୍ ଫ୍ୟାଟି ହେବାର କାରଣ ହୋଇପାରେ। ତେଣୁ ଏକ ସନ୍ତୁଳିତ ଜୀବନଶୈଳୀ ଅବଲମ୍ବନ କରିବା ଓ ନିୟମିତ ସ୍ୱାସ୍ଥ୍ୟ ପରୀକ୍ଷା କରାଇବା ଲିଭର୍ ସ୍ୱାସ୍ଥ୍ୟ ପାଇଁ ଅତ୍ୟନ୍ତ ଜରୁରୀ।
ଡାକ୍ତରଙ୍କ ପରାମର୍ଶ
ଏମ୍ସ ଡାକ୍ତରମାନେ ସୁପାରିଶ କରୁଛନ୍ତି ଯେ ଯଦି ଆପଣ ନିୟମିତ ବ୍ରେଡ୍ ଖାଉଛନ୍ତି, ତେବେ ଏହାର ପରିମାଣ କମାନ୍ତୁ ଓ ସୁସ୍ଥ ବିକଳ୍ପ ବାଛନ୍ତୁ। ଯଦି ଆପଣଙ୍କୁ ଲିଭର୍ ସମ୍ବନ୍ଧୀୟ କୌଣସି ଲକ୍ଷଣ ଯେମିତି ଥକ୍କାପଣ, ପେଟ ଯନ୍ତ୍ରଣା କିମ୍ବା ଭୋକ କମିବା ଭଳି ଅନୁଭବ ହୁଏ, ତୁରନ୍ତ ଡାକ୍ତରଙ୍କ ସହ ପରାମର୍ଶ କରନ୍ତୁ। ନିୟମିତ ଫାଇବ୍ରୋସ୍କାନ ଓ ରକ୍ତ ପରୀକ୍ଷା ମାଧ୍ୟମରେ ଲିଭର୍ର ସ୍ୱାସ୍ଥ୍ୟ ଜାଣିହେବ।
Click it and Unblock the Notifications
Sign in with Google