ଇରାନକୁ ଟ୍ରମ୍ପଙ୍କ ଚେତାବନୀ, ଆନ୍ଦୋଳନକାରୀଙ୍କୁ ହତ୍ୟା କରାଗଲେ ଦୃଢ ପଦକ୍ଷେପ ନେବ ଆମେରିକା
ଇରାନରେ ମୁଦ୍ରାସ୍ଫୀତି ଏବଂ ଟଙ୍କାର ମୂଲ୍ୟ ହ୍ରାସକୁ ନେଇ ଦୁଇ ସପ୍ତାହ ଧରି ବିରୋଧ ପ୍ରଦର୍ଶନ ଜାରି ରହିଛି। ଗତକାଲି ରାତିରେ ନିର୍ବାସିତ ଯୁବରାଜ ପ୍ରିନ୍ସ ରେଜା ପହଲାଭି ଲୋକଙ୍କୁ ଘରୁ ବାହାରକୁ ଆସି ଇସଲାମିକ ଶାସନ ବିରୋଧରେ ପ୍ରଦର୍ଶନ କରିବାକୁ ଆହ୍ବାନ ଦେବା ପରେ ପ୍ରଦର୍ଶନ ଆହୁରି ତୀବ୍ର ହୋଇଥିଲା।
ରେଜା ପହଲାଭିଙ୍କ ଆବେଦନ ପରେ, ବହୁ ସଂଖ୍ୟକ ଲୋକ ରାସ୍ତାକୁ ଓହ୍ଲାଇଥିଲେ। ଏହି ସମୟରେ, ଇରାନ ସରକାର ରାସ୍ତା ଖାଲି କରିବା ପାଇଁ ସୁରକ୍ଷା ବାହିନୀ ନିୟୋଜିତ କରିଥିଲେ। ରିପୋର୍ଟ ହୋଇଛି ଯେ ଅତି କମରେ ୫୦ ଟି ଇରାନ ସହରରେ ବଡ଼ ଧରଣର ପ୍ରତିବାଦ ହେଉଛି। ଲୋକମାନେ ରାସ୍ତାକୁ ଓହ୍ଲାଇ ଇରାନ ଶାସନ ବିରୋଧରେ ସ୍ଲୋଗାନ ଦେଉଛନ୍ତି।
ରେଜା ପହଲାଭିଙ୍କ ସମର୍ଥନରେ ସ୍ଲୋଗାନ: ସବୁଠାରୁ ଉଲ୍ଲେଖନୀୟ କଥା ହେଉଛି ଯେ ପ୍ରଦର୍ଶନ ସମୟରେ, ରେଜା ପହଲାଭିଙ୍କ ସମର୍ଥନରେ ସ୍ଲୋଗାନ ଦିଆଯାଉଥିଲା । କହିରଖୁଛୁ ଯେ, ଏପର୍ଯ୍ୟନ୍ତ ଶାହାଙ୍କ ସମର୍ଥନରେ ସ୍ଲୋଗାନ ଦେଲେ ମୃତ୍ୟୁଦଣ୍ଡରେ ଦଣ୍ଡିତ ହେଉଥିଲେ ଲୋକେ । ଆମେରିକା ସ୍ଥିତ ମାନବାଧିକାର କର୍ମୀ ନ୍ୟୁଜ୍ ଏଜେନ୍ସି ଅନୁଯାୟୀ, ପ୍ରଦର୍ଶନ ସମୟରେ ହିଂସାରେ ଏପର୍ଯ୍ୟନ୍ତ ୩୯ ଜଣ ପ୍ରାଣ ହରାଇଛନ୍ତି । ସେହିପରି ୨୨୬୦ରୁ ଅଧିକ ଲୋକଙ୍କୁ ଅଟକ ରଖାଯାଇଛି।
ଟ୍ରମ୍ପଙ୍କ ଚେତାବନୀ: ଏହି ସମୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନ ଲୋକଙ୍କ ପ୍ରତି ସମର୍ଥନ ପ୍ରକାଶ କରି କହିଛନ୍ତି ଯେ, ଯଦି ସେମାନଙ୍କ ସ୍ୱରକୁ ଦମନ କରିବାକୁ ଚେଷ୍ଟା କରାଯାଏ, ତେବେ ସେମାନଙ୍କୁ ଛଡ଼ାଯିବ ନାହିଁ। ୧୯୭୯ ଇସଲାମିକ୍ ବିପ୍ଳବର ଠିକ୍ ପୂର୍ବରୁ, ଇରାନର ତତ୍କାଳୀନ ଶାହ ମହମ୍ମଦ ରେଜା ପହଲାଭି ଆମେରିକାକୁ ପଳାଇ ଯାଇଥିଲେ। ତାଙ୍କ ପୁଅ, କ୍ରାଉନ ପ୍ରିନ୍ସ ରେଜା ପହଲାଭି ଆମେରିକାରେ ନିର୍ବାସିତ ଅଛନ୍ତି।
ରେଜା ପହଲାଭି କ'ଣ କହିଲେ: ନିର୍ବାସିତ ଯୁବରାଜ ରେଜା ପହଲାଭି ଲୋକଙ୍କୁ ରାସ୍ତାକୁ ଓହ୍ଲାଇ ଇସଲାମିକ୍ ଗଣରାଜ୍ୟ ବିରୋଧରେ ପ୍ରତିବାଦ କରିବାକୁ ନିବେଦନ କରିଥିଲେ। ଏକ ବିବୃତ୍ତିରେ ପହଲାଭି କହିଛନ୍ତି, "ବିଶ୍ୱ ଇରାନକୁ ଦେଖୁଛି। ରାସ୍ତାକୁ ଓହ୍ଲାନ୍ତୁ ଏବଂ ଏକଜୁଟ ହୁଅନ୍ତୁ ଏବଂ ଜୋରଦାର ଦାବି ଉଠାନ୍ତୁ । ମୁଁ ଇସଲାମିକ୍ ଗଣରାଜ୍ୟ, ଏହାର ନେତା ଏବଂ ରିଭୋଲ୍ୟୁସନାରୀ ଗାର୍ଡକୁ ଚେତାବନୀ ଦେଉଛି ଯେ ବିଶ୍ୱ ଏବଂ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ତୁମକୁ କଡ଼ା ନଜର ରଖିଛନ୍ତି। ଲୋକଙ୍କ ଉପରେ ହେଉଥିବା ଅତ୍ୟାଚାରର କଡ଼ା ଜବାବ ଦିଆଯିବ।"
ସ୍ଥାନୀୟ ଲୋକମାନେ କହିଛନ୍ତି ଯେ, ପହଲଭିଙ୍କ ଆବେଦନ ପରେ ଲୋକମାନେ ଗୁରୁବାର ରାତି ୮ଟାରେ ରାସ୍ତାକୁ ଓହ୍ଲାଇଥିଲେ। ପ୍ରଦର୍ଶନକାରୀମାନେ "ଇସଲାମିକ୍ ଗଣରାଜ୍ୟ ନିପାତ ହେଉ" ସ୍ଲୋଗାନ ଦେବା ଆରମ୍ଭ କରିଥିଲେ। ଶାହଙ୍କ ସମର୍ଥନରେ "ଏହା ଶେଷ ଯୁଦ୍ଧ, ପହଲଭିମାନେ ଫେରିବେ" ଭଳି ସ୍ଲୋଗାନ ମଧ୍ୟ ଦିଆଯାଇଥିଲା।
ଇଣ୍ଟରନେଟ୍ ସେବା ବନ୍ଦ: ପରିସ୍ଥିତି ନିୟନ୍ତ୍ରଣ ବାହାରକୁ ଯାଉଥିବାରୁ ଇରାନ ଇଣ୍ଟରନେଟ୍ ସେବା ବନ୍ଦ କରିଦେଇଛି ଏବଂ ଟେଲିଫୋନ୍ ଲାଇନଗୁଡ଼ିକୁ କାଟି ଦେଇଛି। ଇଣ୍ଟରନେଟ୍ ମନିଟରିଂ ଗ୍ରୁପ୍ ନେଟବ୍ଲକ୍ସ କହିଛି ଯେ, ଲାଇଭ୍ ଡାଟା ଦର୍ଶାଉଛି ଯେ ଅନେକ ସେବା ପ୍ରଦାନକାରୀଙ୍କ ମଧ୍ୟରେ ସଂଯୋଗ ବିଚ୍ଛିନ୍ନ ହୋଇଛି, ଯାହା ଫଳରେ ଦେଶର ଅନେକ ଅଞ୍ଚଳ ଅଫଲାଇନ୍ ହୋଇଯାଇଛି।
Click it and Unblock the Notifications
Sign in with Google