ପାନାମା କେନାଲକୁ ନେଇ ଚେତାବନୀ ଦେଲେ ଡୋନାଲ୍ଡ ଟ୍ରମ୍ପ, କହିଲେ…

ୱାଶିଂଟନ: ଆମେରିକାର ନବ ନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପାନାମାକୁ ଧମକ ଦେଇଛନ୍ତି। ଯଦି ସେମାନେ ଆମେରିକୀୟ ଜାହାଜ ଉପରେ ଗମନାଗମନ ଶୁଳ୍କ ଜାରି ରଖନ୍ତି ତେବେ ଆମେରିକା ପାନାମା କେନାଲକୁ ଫେରାଇ ଆଣିବେ। ସୋସିଆଲ ମିଡିଆ ପ୍ଲାଟଫର୍ମ 'ଟ୍ରୁଥ' 'ରେ ଏଭଳି ପୋଷ୍ଟ କରିଛନ୍ତି ଟ୍ରମ୍ପ। ସେ କହିଛନ୍ତି ଯେ ପାନାମା କେନାଲକୁ ଆମେରିକାର ଏକ ଗୁରୁତ୍ୱପୂର୍ଣ୍ଣ ଜାତୀୟ ସମ୍ପତ୍ତି ଭାବରେ ବିବେଚନା କରାଯାଏ କାରଣ ଆମେରିକାର ଅର୍ଥନୀତି ତଥା ଜାତୀୟ ନିରାପତ୍ତାରେ ଏହାର ଗୁରୁତ୍ୱପୂର୍ଣ୍ଣ ଭୂମିକା ରହିଛି ।

ଟ୍ରମ୍ପ ଚେତାବନୀ ଦେଇଛନ୍ତି ଯେ ପାନାମା କେନାଲକୁ ଭୁଲ୍‌ ହାତରେ ପଡ଼ିବାକୁ ଦିଆଯିବ ନାହିଁ। ଟ୍ରମ୍ପଙ୍କ ଏହି ପ୍ରସଙ୍ଗ ଚୀନ ପ୍ରତି ବୋଲି କୁହାଯାଉଛି। ଟ୍ରମ୍ପ ଲେଖିଛନ୍ତି ଯେ ପାନାମା କେନାଲକୁ ଚୀନ୍ ପରିଚାଳନା କରିବା ଉଚିତ ନୁହେଁ। ପନାମା କେନାଲକୁ ବିଶ୍ୱ ଭୂ-ରାଜନୀତିରେ ଗୁରୁତ୍ୱପୂର୍ଣ୍ଣ ବୋଲି କୁହାଯାଏ। ୮୨ କିଲୋମିଟର ଲମ୍ବର ଏହି କେନାଲ ଆଟଲାଣ୍ଟିକ ମହାସାଗର ଓ ପ୍ରଶାନ୍ତ ମହାସାଗରକୁ ସଂଯୋଗ କରୁଛି। ପୃଥିବୀର ୬ ପ୍ରତିଶତ ସାମୁଦ୍ରିକ ବାଣିଜ୍ୟ ପାନାମା କେନାଲ ମାଧ୍ୟମରେ ହୋଇଥାଏ।

ପାନାମା କେନାଲ ମଧ୍ୟ ଆମେରିକାର ଅର୍ଥନୀତି ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। କାରଣ ବର୍ତ୍ତମାନ ନ୍ୟୁୟର୍କରୁ ସାନ୍ ଫ୍ରାନ୍ସିସ୍କୋ ଯାଉଥିବା ମାଲବାହୀ ଜାହାଜଗୁଡ଼ିକୁ ପାନାମା କେନାଲ ଦେଇ ୮୩୭୦ କିଲୋମିଟର ଯାତ୍ରା କରିବାକୁ ପଡ଼ୁଛି। କିନ୍ତୁ ଯଦି ପାନାମା କେନାଲ ପରିବର୍ତ୍ତେ ପୁରୁଣା ମାର୍ଗ ଦେଇ ମାଲ ପଠାଯାଏ, ତେବେ ଜାହାଜଗୁଡ଼ିକୁ ସମସ୍ତ ଦକ୍ଷିଣ ଆମେରିକୀୟ ଦେଶ ଭ୍ରମଣ କରିବା ପରେ ସାନ୍ ଫ୍ରାନ୍ସିସ୍କୋ ଯିବାକୁ ପଡ଼ିବ ଏବଂ ଏହାର ଦୂରତା ୨୨ ହଜାର କିଲୋମିଟରରୁ ଅଧିକ ହେବ।