ମୁଣ୍ଡ ନୁଆଁଇ ଶୁଳ୍କ ହଟାଇଲେ ଟ୍ରମ୍ପ୍‌

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଅନେକ କୃଷି ଆମଦାନୀ ଉପରେ ଶୁଳ୍କ ହ୍ରାସ କରିବା ପାଇଁ ଏକ ଆଦେଶରେ ସ୍ୱାକ୍ଷର କରିଛନ୍ତି। ଗୋମାଂସ, ଟମାଟୋ, କଫି ଏବଂ କଦଳୀ ଭଳି ଉତ୍ପାଦଗୁଡ଼ିକ ପାରସ୍ପରିକ ଶୁଳ୍କରୁ ମୁକ୍ତ ରହିବେ। କିନ୍ତୁ ସମ୍ପୂର୍ଣ୍ଣ ଶୁଳ୍କରୁ ମୁକ୍ତ ରହିବେ ନାହିଁ। ବୃଦ୍ଧି ପାଉଥିବା ମୁଦ୍ରାସ୍ଫୀତି ଏବଂ ଜନସାଧାରଣଙ୍କ ଅସନ୍ତୋଷ ମଧ୍ୟରେ ଏହି ପଦକ୍ଷେପ ନିଆଯାଇଛି। ଟ୍ରମ୍ପ ଶୁକ୍ରବାର ଟାରିଫ୍‌ରେ ଏକ ବଡ଼ ପରିବର୍ତ୍ତନ କରିଛନ୍ତି। ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇ, ସେ ଅନେକ କୃଷି ଆମଦାନୀ ଉପରେ ଟାରିଫ୍‌ ହ୍ରାସ କରିବା ପାଇଁ ଏକ କାର୍ଯ୍ୟନିର୍ବାହୀ ନିର୍ଦ୍ଦେଶରେ ସ୍ବାକ୍ଷର କରିଛନ୍ତି। ଏହି ନିର୍ଦ୍ଦେଶ ଗୁରୁବାର ଠାରୁ କାର୍ଯ୍ୟକାରୀ ହେବ, ଅର୍ଥାତ୍‌ ଏହା ପୂର୍ବବର୍ତ୍ତୀ ଭାବରେ କାର୍ଯ୍ୟକାରୀ ହୋଇଛି। ଏହି ନିଷ୍ପତ୍ତି ଫଳରେ ଗୋମାଂସ, ଟମାଟୋ, କଫି ଏବଂ କଦଳୀ ସମେତ ୧୦୦ରୁ ଅଧିକ ଆମଦାନୀ ହୋଇଥିବା ସାମଗ୍ରୀ ଉପରେ ଟାରିଫ୍‌ ହ୍ରାସ ହେବ। ଏହା ମେକ୍ସିକୋକୁ ଯଥେଷ୍ଟ ଲାଭ ଦେବ।

CNN ରିପୋର୍ଟ କରିଛି ଯେ ଟ୍ରମ୍ପଙ୍କ ନିର୍ଦ୍ଦେଶ ଏହି ସାମଗ୍ରୀଗୁଡ଼ିକୁ ଦଶ ପ୍ରତିଶତରୁ ପଚାଶ ପ୍ରତିଶତ ପର୍ଯ୍ୟନ୍ତ ପାରସ୍ପରିକ ଟାରିଫ୍‌ ହାରରୁ ମୁକ୍ତ କରିଛି। ତଥାପି, ଏଗୁଡ଼ିକ ସମ୍ପୂର୍ଣ୍ଣ ଟାରିଫ୍‌ ମୁକ୍ତ ନୁହେଁ। ଉଦାହରଣ ସ୍ବରୂପ, ମେକ୍ସିକୋରୁ ଟମାଟୋ ଉପରେ ପୂର୍ବରୁ ଲାଗୁ ହୋଇଥିବା ୧୭ ପ୍ରତିଶତ ଟାରିଫ୍‌ କାର୍ଯ୍ୟକାରୀ ରହିବ। ପ୍ରାୟ ତିନି ଦଶନ୍ଧି ପୁରୁଣା ବାଣିଜ୍ୟ ଚୁକ୍ତିନାମାର ଅବଧି ସମାପ୍ତ ହେବା ପରେ ଏହି ହାର ଜୁଲାଇରେ କାର୍ଯ୍ୟକାରୀ ହୋଇଥିଲା। ଏହି ପରିବର୍ତ୍ତନ ପରେ ଟମାଟୋର ମୂଲ୍ୟ ତୁରନ୍ତ ବୃଦ୍ଧି ପାଇଲା। ଟ୍ରମ୍ପଙ୍କ ରାଷ୍ଟ୍ରପତିତ୍ୱ ପରଠାରୁ ବର୍ତ୍ତମାନ ପାରସ୍ପରିକ ଟାରିଫ୍‌ରୁ ମୁକ୍ତ ହୋଇଥିବା ଅନେକ ସାମଗ୍ରୀ ବର୍ଷ ମଧ୍ୟରେ ସବୁଠାରୁ ମହଙ୍ଗା ହୋଇଯାଇଥିଲା।

ଟ୍ରମ୍ପଙ୍କ ଟାରିଫ୍‌ ଏବଂ ଘରୋଇ ଉତ୍ପାଦନର ଅଭାବ ଯୋଗୁଁ ମୂଲ୍ୟ ବୃଦ୍ଧି ହୋଇଥିଲା। ଉଦାହରଣ ସ୍ବରୂପ, ଅଗଷ୍ଟ ମାସରେ ବ୍ରାଜିଲରୁ ଆମଦାନୀ ହେଉଥିବା କଫି ଉପରେ ପଚାଶ ପ୍ରତିଶତ ଟାରିପ୍‌ ଲାଗୁ କରାଯାଇଥିଲା। ଗ୍ରାହକମାନେ ପୂର୍ବ ବର୍ଷ ତୁଳନାରେ ସେପ୍ଟେମ୍ବରରେ କଫି ପାଇଁ ପ୍ରାୟ କୋଡ଼ିଏ ପ୍ରତିଶତ ଅଧିକ ଦେଇଥିଲେ। ଏହି ପଦକ୍ଷେପ ଏପରି ଏକ ସମୟରେ ଆସିଛି ଯେତେବେଳେ ସମ୍ପ୍ରତିକ ନିର୍ବାଚନ ପରେ ମତଦାତାମାନେ ମୁଦ୍ରାସ୍ଫୀତି ଏବଂ ଅର୍ଥନୀତିର ଅବସ୍ଥା ଉପରେ ଅସନ୍ତୋଷ ପ୍ରକାଶ କରିଥିଲେ। କିଛି ରାଜ୍ୟର ଉପନିର୍ବାଚନରେ, ମତଦାତାମାନେ ବିରୋଧୀ ଦଳଗୁଡ଼ିକୁ ସମର୍ଥନ କରି ସରକାରଙ୍କ ବିରୁଦ୍ଧରେ ଏକ ପ୍ରବୃତ୍ତି ଦେଖାଇଥିଲେ।