ପୁଣି ପଲଟିଗଲେ ଟ୍ରମ୍ପ, ମସ୍କଙ୍କୁ ପ୍ରଶଂସା, କହିଦେଲେ କିଛି ଏମିତି......

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ଏଲନ ମସ୍କଙ୍କ ମଧ୍ୟରେ ଚାଲିଥିବା ବିବାଦ ମଧ୍ୟରେ, ଟ୍ରମ୍ପ ମସ୍କଙ୍କ ପ୍ରଶଂସା କରିଛନ୍ତି। ଏକ ସାକ୍ଷାତକାରରେ ଟ୍ରମ୍ପ ତାଙ୍କୁ ଜଣେ ଚମତ୍କାର ବ୍ୟକ୍ତି ଭାବରେ ବର୍ଣ୍ଣନା କରିଛନ୍ତି। ମସ୍କ ମେ ୨୦୨୫ ପର୍ଯ୍ୟନ୍ତ ଟ୍ରମ୍ପଙ୍କ ରାଷ୍ଟ୍ରପତି ପରାମର୍ଶଦାତା ଥିଲେ, କିନ୍ତୁ ତାଙ୍କ କାର୍ଯ୍ୟକାଳ ଶେଷ ହେବା ପରେ, ଉଭୟଙ୍କ ମଧ୍ୟରେ ସମ୍ପର୍କ ଖରାପ ହୋଇଯାଇଥିଲା। ମସ୍କ ଟ୍ରମ୍ପଙ୍କ ଟିକସ ହ୍ରାସ ବିଲକୁ ସମାଲୋଚନା କରିଥିଲେ।

ନିକଟରେ ଏକ ଆଲୋଚନାରେ ଟ୍ରମ୍ପ ମସ୍କଙ୍କୁ ବୁଦ୍ଧିମାନ ଏବଂ ସର୍ବଦା ସଫଳ ବୋଲି ବର୍ଣ୍ଣନା କରିଛନ୍ତି। ଟ୍ରମ୍ପ କହିଛନ୍ତି, ମୁଁ ଭାବୁଛି ଏଲୋନ ଜଣେ ଚମତ୍କାର ବ୍ୟକ୍ତି। ମୁଁ ତାଙ୍କ ସହ ଅଧିକ କଥା ହୁଏ ନାହିଁ, କିନ୍ତୁ ମୁଁ ଜାଣେ ସେ ସର୍ବଦା ଭଲ କରିବେ। ସେ ବହୁତ ବୁଦ୍ଧିମାନ। ସେ ପୂର୍ବରୁ ମୋ ସହିତ ପ୍ରଚାରରେ ମଧ୍ୟ ଯୋଗ ଦେଇଥିଲେ। ପରେ ସେ ଟିକେ ରାଗିଗଲେ, ଯାହା ହୁଏତ ଠିକ ନ ଥିଲା।

ରାଷ୍ଟ୍ରପତି ଟ୍ରମ୍ପ କହିଛନ୍ତି, ଟେସଲାର ସିଇଓ ଏଲନ ମସ୍କ ତାଙ୍କ ଉପରେ ରାଗିଥିଲେ। କାରଣ ସରକାର ଇଲେକ୍ଟ୍ରିକ କାର ଉପରେ ଟିକସ ଛାଡ (ଟ୍ୟାକ୍ସ କ୍ରେଡିଟ) ହଟାଇ ଦେଇଥିଲେ। ତଥାପି, ମସ୍କ ପୂର୍ବରୁ ଟ୍ରମ୍ପଙ୍କ ଦାବିକୁ ଅସ୍ବୀକାର କରିସାରିଛନ୍ତି। ଟ୍ରମ୍ପ କହିଛନ୍ତି,ଇଲେକ୍ଟ୍ରିକ କାର ପାଇଁ ତିଆରି ନିୟମ ମସ୍କଙ୍କୁ ସୁହାଏ ନାହିଁ। ମୁଁ ନିଜେ ଚାହେଁ ନାହିଁ ଯେ ସମସ୍ତଙ୍କୁ ଇଲେକ୍ଟ୍ରିକ କାର କିଣିବାକୁ ବାଧ୍ୟ କରାଯାଉ।

୫୪ତମ ଜନ୍ମଦିନରେ, ମସ୍କ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଟ୍ରମ୍ପଙ୍କ ନୂତନ ଟିକସ ଏବଂ ଖର୍ଚ୍ଚ ବିଲ୍‌କୁ ତୀବ୍ର ସମାଲୋଚନା କରିଛନ୍ତି। ସେ ଏହି ବିଲ୍‌କୁ ସମ୍ପୂର୍ଣ୍ଣ ପାଗଳ ଏବଂ କ୍ଷତିକାରକ ବୋଲି କହିଛନ୍ତି। ପ୍ରାୟ ୧,୦୦୦ ପୃଷ୍ଠାର ଏହି ବିଲ ଉପରେ ସିନେଟରେ ଖୁବ ଶୀଘ୍ର ବିତର୍କ ଆରମ୍ଭ ହେବାକୁ ଯାଉଛି।