୫ ଭାରତୀୟ ନାଗରିକଙ୍କୁ ଅପହରଣ କଲେ ଆତଙ୍କବାଦୀ

ପଶ୍ଚିମ ଆଫ୍ରିକୀୟ ରାଷ୍ଟ୍ର ମାଲିର କୌବି ନିକଟରେ ପାଞ୍ଚ ଜଣ ଭାରତୀୟ ନାଗରିକଙ୍କୁ ଅପହରଣ କରିଛନ୍ତି ଅଲ-କାଏଦା ସହିତ ଜଡିତ ଆତଙ୍କବାଦୀ। ଏହି ଭାରତୀୟମାନେ ଏକ ବିଦ୍ୟୁତକରଣ ପ୍ରକଳ୍ପରେ କାମ କରୁଥିବା ଏକ ଘରୋଇ କମ୍ପାନୀର କର୍ମଚାରୀ ଥିଲେ। ଗୁରୁବାର ଦିନ ଏହି ଘଟଣା ଘଟିଥିବା ନେଇ ସୂଚନା ମିଳିଛି।

କର୍ମଚାରୀମାନେ ଯାଉଥିବା ଏକ ଗାଡିକୁ ଘେରି ସମସ୍ତଙ୍କୁ ଅପହରଣ କରିନେଇଥିଲେ ଆତଙ୍କବାଦୀ। ଏହା ପରେ ସୁରକ୍ଷାକୁ ଦୃଷ୍ଟିରେ ରଖି ଅବଶିଷ୍ଟ ଭାରତୀୟ କର୍ମଚାରୀମାନଙ୍କୁ ତୁରନ୍ତ ରାଜଧାନୀ ବାମାକୋକୁ ସ୍ଥାନାନ୍ତର କରାଯାଇଥିଲା। ଯଦିଓ କୌଣସି ଆତଙ୍କବାଦୀ ସଂଗଠନ ଏହି ଘଟଣାର ଦାୟିତ୍ୱ ନେଇନାହିଁ, ତଥାପି ଅଲ-କାଏଦା ଏବଂ ଆଇଏସଆଇଏସ ସହିତ ଜଡିତ ନେଟୱାର୍କ ଉପରେ ସନ୍ଦେହ କରାଯାଉଛି।

ଏହା ପୂର୍ବରୁ ଜୁଲାଇ ୨୦୨୫ରେ, ରାଜସ୍ଥାନ, ଓଡ଼ିଶା ଏବଂ ତେଲେଙ୍ଗାନାର ନାଗରିକଙ୍କ ସମେତ ତିନି ଜଣ ଭାରତୀୟଙ୍କୁ ଅପହରଣ କରାଯାଇଥିଲା। ଅଲ-କାଏଦା ସହିତ ଜଡିତ ଜମାତ ନୁସରତ ଅଲ-ଇସଲାମ ୱାଲ-ମୁସଲିମିନ (ଜେଏନଆଇଏମ) ସେହି ଘଟଣାର ଦାୟିତ୍ୱ ନେଇଥିଲା।