ବିଶ୍ୱରେ ବିରଳ ଘଟଣା: ମହିଳାଙ୍କ ମସ୍ତିଷ୍କରୁ ମିଳିଲା ସାପ ଦେହରେ ଥିବା ପରଜୀବୀ

Published: Wednesday, August 30, 2023, 22:35 [IST]

ମେଲବୋର୍ଣ୍ଣ: ଅଷ୍ଟ୍ରେଲିଆରୁ ଏକ ଆଶ୍ଚର୍ଯ୍ୟଜନକ ମାମଲା ସାମ୍ନାକୁ ଆସିଛି, ଯେଉଁଠାରେ ଜଣେ ମହିଳାଙ୍କ ମସ୍ତିଷ୍କ ଭିତରେ ଜୀବନ୍ତ ସାପ ଦେହରେ ବଢ଼ୁଥିବା ପରଜୀବୀ ଦେଖିବାକୁ ମିଳିଛି । ମଣିଷରେ ଏଭଳି ସଂକ୍ରମଣର ଏହା ପ୍ରଥମ ଘଟଣା ବୋଲି କୁହାଯାଉଛି । ଏପରିକି ଡାକ୍ତରମାନେ ଏହି ବିଷୟରେ ଆଶ୍ଚର୍ଯ୍ୟ ହୋଇ ଯାଇଛନ୍ତି ।

ତେବେ ଉକ୍ତ ମହିଳାଙ୍କ ବୟସ ୬୪ ବର୍ଷ ବୋଲି ଜଣାପଡିଛି । ମହିଳାଜଣଙ୍କ ଦୀର୍ଘଦିନ ହେବ ଜଣେ ଡାକ୍ତରଙ୍କ ପାଖେ ଚିକିତ୍ସିତ ହେଉଥିଲେ । ନିମୋନିଆ, ପେଟ ଦରଜ, ଝାଡା, ଶୁଖିଲା କାଶ ଓ ରାତିରେ ଝାଳ ବାହାରିବା ପରି ଲକ୍ଷଣ ଦେଖା ଦେଇଥିଲା । ଏମଆରଆଇ ସ୍କାନ କରାଯିବା ପରେ ୩ ଇଂଚ ଲମ୍ବର ଏକ ପରଜୀବୀ ଦେଖିବାକୁ ମିଳିଥିଲା । ଏହା ସାଧାରଣତଃ କାର୍ପେଟ ପାଇଥନ ନିକଟରେ ଦେଖିବାକୁ ମିଳିଥାଏ । ତେବେ ଏହା କିପରି ମହିଳାଙ୍କ ଶରୀର ମଧ୍ୟକୁ ପ୍ରବେଶ କଲା ତାହା ଏ ପର୍ଯ୍ୟନ୍ତ ବି ସ୍ପଷ୍ଟ ହୋଇ ପାରିନି ।

ତେବେ ଜଣେ ନ୍ୟୁରୋସର୍ଜନ କହିଛନ୍ତି ଯେ ଏପରି ଘଟଣା ଆଶ୍ଚର୍ଯ୍ୟଜନକ । କାରଣ ଏହା ମଣିଷମାନଙ୍କଠାରେ ଦେଖାଯାଏ ନାହିଁ । ସାଧାରଣତଃ ସାପଙ୍କ ନିକଟରେ ଦେଖାଯାଏ । ତେବେ ସାପରେ ମିଳୁଥିବା ଏହି ପରଜୀବି କିପରି ମହିଳାଙ୍କ ଶରୀରରେ ପହଞ୍ଚିଲା ତାହାର ରହସ୍ୟ ସମାଧାନ କରିବାକୁ ଡାକ୍ତରମାନେ ଚେଷ୍ଟା କରୁଛନ୍ତି । ତଥାପି, କିଛି ଡାକ୍ତର ବିଶ୍ୱାସ କରନ୍ତି ଯେ ପୋକର ଅଣ୍ଡା ହୁଏତ କିଛି ଖାଦ୍ୟ ପଦାର୍ଥରେ ଆସିଥାଇ ପାରେ, ଯାହା ମହିଳା ଖାଇଥାଇ ପାରନ୍ତି । ମହିଳା ଖାଦ୍ୟ ପାଇଁ ନିଜ ବାଡିରେ ପାଳଙ୍ଗ ଚାଷ କରିଥିଲେ । ତେଣୁ ତାହା ମହିଳାଙ୍କ ଶରୀରକୁ ଖାଦ୍ୟ ମାଧ୍ୟମରେ ପ୍ରବେଶ କରିଥାଇପାରେ ବୋଲି ଅନୁମାନ କରାଯାଉଛି ।

Published On August 30, 2023