ଶ୍ରୀଲଙ୍କା ରାଷ୍ଟ୍ରପତି ଭାବେ ଶପଥ ନେଲେ ରାନିଲ ବିକ୍ରମସିଙ୍ଘେ

ଶ୍ରୀଲଙ୍କାରେ ଆଜି ରାଷ୍ଟ୍ରପତି ଭାବ ଶପଥ ଗ୍ରହଣ କରିଛନ୍ତି ରାନିଲ ବିକ୍ରମସିଙ୍ଘେ । ପୂର୍ବତନ ରାଷ୍ଟ୍ରପତି ଗୋଟୋବାୟାଙ୍କ ବିଦେଶ ପଳାୟନ ପରେ କାମଚଳା ରାଷ୍ଟ୍ରପତି ଦାୟିତ୍ବରେ ଥିବା ବିକ୍ରମସିଙ୍ଘେ ଆଜି ନୂତନ ରାଷ୍ଟ୍ରପତି ଭାବେ ଶପଥ ଗ୍ରହଣ କରିଛନ୍ତି ।

Published: Thursday, July 21, 2022, 17:29 [IST]

କଲମ୍ବୋ: ଶ୍ରୀଲଙ୍କାରେ ଆଜି ରାଷ୍ଟ୍ରପତି ଭାବ ଶପଥ ଗ୍ରହଣ କରିଛନ୍ତି ରାନିଲ ବିକ୍ରମସିଙ୍ଘେ । ପୂର୍ବତନ ରାଷ୍ଟ୍ରପତି ଗୋଟୋବାୟାଙ୍କ ବିଦେଶ ପଳାୟନ ପରେ କାମଚଳା ରାଷ୍ଟ୍ରପତି ଦାୟିତ୍ବରେ ଥିବା ବିକ୍ରମସିଙ୍ଘେ ଆଜି ନୂତନ ରାଷ୍ଟ୍ରପତି ଭାବେ ଶପଥ ଗ୍ରହଣ କରିଛନ୍ତି । ତ୍ରିକୋଣୀୟ ପ୍ରତିଦ୍ବନ୍ଦିତାରେ ବିକ୍ରମସିଙ୍ଘେ ସର୍ବାଧିକ 134 ଖଣ୍ଡ ଭୋଟ ସହ ବିଜୟ ହାସଲ କରିଥିଲେ । ବହୁ ବାଦ ବିବାଦ ଓ ରାଜନୈତିକ ସଙ୍କଟ ମଧ୍ୟରେ ଶ୍ରୀଲଙ୍କା ନୂଆ ରାଷ୍ଟ୍ରପତି ପାଇଛି ।

ବୁଧବାର ଶ୍ରୀଲଙ୍କାରେ ହୋଇଥିବା ରାଷ୍ଟ୍ରପତି ନିର୍ବାଚନରେ ତ୍ରିକୋଣୀୟ ପ୍ରତିଦ୍ବନ୍ଦିତା ଦେଖିବାକୁ ମିଳିଥିଲା । ବିକ୍ରମସିଙ୍ଘେଙ୍କ ସପକ୍ଷରେ 134 ଖଣ୍ଡ ଭୋଟ ମିଳିଥିବା ବେଳେ ନିକଟତମ ପ୍ରତିଦ୍ବନ୍ଦୀ ଦୁଲାସ ଅହ୍ଲାପେରୁମାଙ୍କୁ 82 ଖଣ୍ଡ ଭୋଟ ମିଳିଥିଲା । ଶ୍ରୀଲଙ୍କା ସଂସଦଦରେ 225 ସଦସ୍ୟ ମଧ୍ୟରୁ 223 ଜଣ ଭୋଟ୍‌ ଦେଇଥିବା ବେଳେ 2 ଜଣ ଅନୁପସ୍ଥିତ ଥିଲେ। ଏଥିରେ 4ଟି ଭୋଟ ନାକଚ ହୋଇଥିବା ବେଳେ ମୋଟ 219ଟି ଭୋଟ୍‌ ବୈଧ ହୋଇଥିଲା । ଏହାପୂର୍ବରୁ ସେ 6 ଥର ଦେଶର ପ୍ରଧାନମନ୍ତ୍ରୀ ଥିଲେ ବିକ୍ରମସିଙ୍ଘେ । ଜାରି ରହିଥିବା ଅସ୍ଥିରତା ଓ ହିଂସା ମଧ୍ୟରେ ଦେଶର ଅର୍ଥନୀତିକୁ ଟ୍ରାକକୁ ଫେରାଇବା ଓ ସ୍ଥିତିକୁ ସ୍ବାଭାବିକ କରିବା ବିକ୍ରମସିଙ୍ଘେଙ୍କ ପାଇଁ ବଡ ଆହ୍ବାନ ହେବାକୁ ଯାଉଛି ।

ଶ୍ରୀଲଙ୍କାରେ 22 ନିୟୁତ ଲୋକ ବର୍ତ୍ତମାନ ସେମାନଙ୍କର ମୌଳିକ ଆବଶ୍ୟକତା ପୂରଣ କରିବାକୁ ସଂଘର୍ଷ କରୁଛନ୍ତି । କ୍ରମାଗତ ବିଦେଶୀ ଋଣ ପରେ 2019 ଟିକସ ହ୍ରାସ ପ୍ୟାକେଜ୍, ଏବଂ କୋଭିଡ-19 ମହାମାରୀ ଫଳରେ ଶ୍ରୀଲଙ୍କାର ଫରେକ୍ସ ଋଣ 50 ବିଲିୟନ ଡଲାର ଅତିକ୍ରମ କରିଛି। ଜାତିସଂଘର ମାନବିକ କାର୍ଯ୍ୟାଳୟ ଓସିଏ ଅନୁଯାୟୀ ଚଳିତ ବର୍ଷ ପ୍ରାରମ୍ଭରେ ଖାଦ୍ୟ ଏବଂ ଶକ୍ତି ମୂଲ୍ୟ ସହିତ ପର୍ଯ୍ୟଟନର ପତନ ହୋଇଛି । ବର୍ତ୍ତମାନ ଶ୍ରୀଲଙ୍କାକୁ ଚଳିତ ବର୍ଷ ଶେଷ ସୁଦ୍ଧା 7 ବିଲିୟନ ଡଲାର ଏବଂ 2026 ସୁଦ୍ଧା 25 ବିଲିୟନ ଡଲାର ବିଦେଶୀ ଋଣ ଦେବାକୁ ପଡିବ ।

Published On July 21, 2022