ବ୍ରାଜିଲ ରାଷ୍ଟ୍ରପତି ଭବନରେ ଭଙ୍ଗାରୁଜା ଘଟଣାର ନିନ୍ଦା କଲେ ପ୍ରଧାନମନ୍ତ୍ରୀ ମୋଦି

ନୂଆଦିଲ୍ଲୀ: ଗତକାଲି ବ୍ରାଜିଲର ପୂର୍ବତନ ରାଷ୍ଟ୍ରପତି ଜାଇର୍ ବୋଲସୋନାରୋଙ୍କ ସମର୍ଥକ ମାନେ ବ୍ରାଜିଲିଆରେ ନୂତନ ରାଷ୍ଟ୍ରପତି ଲୁଇଜ୍ ଇନାସିଓ ଲୁଲା ଦା ସିଲଭାଙ୍କ ଶପଥ ଗ୍ରହଣ ବିରୋଧରେ ରାସ୍ତାରେ ହିଂସା ପ୍ରଦର୍ଶନ କରୁଛନ୍ତି । ବ୍ରାଜିଲ କଂଗ୍ରେସ (ସଂସଦ ଗୃହ) ଠାରୁ ଆରମ୍ଭ କରି ରାଷ୍ଟ୍ରପତି, ସୁପ୍ରିମ୍ କୋର୍ଟ ପ୍ରବେଶ କରି ଭଙ୍ଗାରୁଜା କରିଛନ୍ତି । ଏହା ପରେ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରି ପ୍ରାୟ ୪୦୦ ବିକ୍ଷୋଭକାରୀଙ୍କୁ ଗିରଫ କରିଥିଲା ।

ବ୍ରାଜିଲରେ ଏହି ପରିସ୍ଥିତିକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଉଦବେଗ ପ୍ରକାଶ କରିଛନ୍ତି । ବ୍ରାଜିଲର ରାଷ୍ଟ୍ରପତି ଲୁଲା ଦା ସିଲଭାଙ୍କୁ ଟ୍ୱିଟରରେ ଟ୍ୟାଗ୍ କରି ସେ ଲେଖିଛନ୍ତି, "ରାଜଧାନୀ ବ୍ରାଜିଲିଆରେ ଦେଶର ଅନୁଷ୍ଠାନରେ ଦଙ୍ଗା, ବିଶୃଙ୍ଖଳା ପ୍ରଦର୍ଶନକୁ ନେଇ ମୁଁ ଚିନ୍ତିତ। ଗଣତାନ୍ତ୍ରିକ ପରମ୍ପରାକୁ ସମସ୍ତେ ସମ୍ମାନ ଦେବା ଉଚିତ୍। ପ୍ରଧାନମନ୍ତ୍ରୀ ମୋଦୀ ଆହୁରି ଲେଖିଛନ୍ତି, ଆମେ ବ୍ରାଜିଲ ସରକାରଙ୍କୁ ଆମେ ସମର୍ଥନ ଜଣାଉଛୁ । "

ଗତ ବର୍ଷ ଅକ୍ଟୋବରରେ ଅନୁଷ୍ଠିତ ନିର୍ବାଚନରେ ​​ବୋଲସନାରୋ ପରାସ୍ତ ହୋଇଥିବାବେଳେ ଲୁଇଜ୍ ଇନାସିଓ ଲୁଲା ଦା ସିଲଭାଙ୍କ ନେତୃତ୍ୱରେ ବାମପନ୍ଥୀ ଦଳ ଜିତିଥିଲା । ଯାହା ପରେ ଲୁଲା ଦା ସିଲଭା ତୃତୀୟ ଥର ପାଇଁ ରାଷ୍ଟ୍ରପତି ଭାବରେ ଶପଥ ଗ୍ରହଣ କରିଥିଲେ। ବୋଲସନାରୋ ସମର୍ଥକମାନେ ନିର୍ବାଚନର ଫଳାଫଳ ଗ୍ରହଣ କରିବାକୁ ମନା କରି ଏକ ପ୍ରଦର୍ଶନ ଆରମ୍ଭ କରିଥିଲେ ଯାହା ବର୍ତ୍ତମାନ ହିଂସାତ୍ମକ ରୂପ ନେଇଛି ।

ରବିବାର ଦିନ, ବୋଲସନାରୋଙ୍କ ସମର୍ଥକମାନେ ସୁରକ୍ଷା ବାହିନୀର କର୍ଡନ ଭାଙ୍ଗି ସଂସଦ ଗୃହ, ରାଷ୍ଟ୍ରପତିଙ୍କ ଗୃହ ଏବଂ ସୁପ୍ରିମକୋର୍ଟରେ ପ୍ରବେଶ କରିଥିଲେ। ବିକ୍ଷୋଭକାରୀମାନେ ଏଠାରେ ଭଙ୍ଗାରୁଜା କରିଥିଲେ । ଏଥି ସହ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରି ୪୦୦ ଜଣଙ୍କୁ ଗିରଫ କରିଛି । ଏହି ଦଙ୍ଗାରେ କାହାରି ମୃତ୍ୟୁ ଖବର ସାମ୍ନାକୁ ଆସି ନାହିଁ । ଆମେରିକାର ରାଷ୍ଟ୍ରପତି ଜୋ ବାଇଡେନ ମଧ୍ୟ ଏହି ଘଟଣାକୁ ନିନ୍ଦା କରିଛନ୍ତି । ସେ ଟୁଇଟ୍ କରି ଲେଖିଛନ୍ତି, ବ୍ରାଜିଲର ଗଣତାନ୍ତ୍ରିକ ଅନୁଷ୍ଠାନକୁ ଆମେରିକା ଏହାର ସମ୍ପୂର୍ଣ୍ଣ ସମର୍ଥନ ଦେବ । ଏହି ଆକ୍ରମଣକୁ ଆମେ ନିନ୍ଦା କରୁଛୁ ।

English summary

PM Modi On Brazil: Modi expressed his deep concern over rioting in brazil