ଇରାନ ଉପରେ ଆମେରିକାର ଭୟଙ୍କର ଆକ୍ରମଣକୁ ପାକିସ୍ତାନର ବୟାନ, ଯୁଦ୍ଧକୁ ନେଇ କହିଦେଲା କିଛି ଏମିତି.....

ପାକିସ୍ତାନର ବୈଦେଶିକ ମନ୍ତ୍ରଣାଳୟ ଇରାନର ତିନୋଟି ପ୍ରମୁଖ ପରମାଣୁ ସ୍ଥଳ ଉପରେ ଆମେରିକାର ସାମରିକ ଆକ୍ରମଣକୁ କଡ଼ା ନିନ୍ଦା କରି ଏକ ସରକାରୀ ବୟାନ ଜାରି କରିଛି। ବୈଦେଶିକ ମନ୍ତ୍ରଣାଳୟ କହିଛି ଯେ ଇରାନର ସାର୍ବଭୌମତ୍ୱ ଉପରେ ଏହି ଆକ୍ରମଣ ଆଞ୍ଚଳିକ ଶାନ୍ତି ଏବଂ ସ୍ଥିରତା ପାଇଁ ଏକ ଗମ୍ଭୀର ବିପଦ।

ଇରାନର ପରମାଣୁ ସ୍ଥଳ ଉପରେ ଆମେରିକାର ସଦ୍ୟତମ ଆକ୍ରମଣ ଉପରେ ପାକିସ୍ତାନ ଗଭୀର ଚିନ୍ତା ପ୍ରକାଶ କରିଛି। ପାକିସ୍ତାନର ବୈଦେଶିକ ମନ୍ତ୍ରଣାଳୟ କହିଛି ଯେ ଏହି ଆକ୍ରମଣ ପୂର୍ବରୁ ଚାଲିଥିବା ଇସ୍ରାଏଲୀ କାର୍ଯ୍ୟର ଏକ ଅଂଶ ଏବଂ ଏହା ଅଞ୍ଚଳରେ ଉତ୍ତେଜନା ଏବଂ ହିଂସାକୁ ଆହୁରି ବୃଦ୍ଧି କରିପାରେ। ପାକିସ୍ତାନ ବିଶ୍ୱାସ କରେ ଯେ ଏହି ପରିସ୍ଥିତି କେବଳ ମଧ୍ୟପ୍ରାଚ୍ୟ ପାଇଁ ନୁହେଁ ବରଂ ସମଗ୍ର ବିଶ୍ୱର ଶାନ୍ତି ଏବଂ ସ୍ଥିରତା ପାଇଁ ବିପଜ୍ଜନକ।

ପାକିସ୍ତାନ ସ୍ପଷ୍ଟ ଭାବରେ କହିଛି ଯେ ଏହି ଆକ୍ରମଣଗୁଡ଼ିକ ଅନ୍ତର୍ଜାତୀୟ ଆଇନର ସମସ୍ତ ନିୟମ ଏବଂ ଜାତିସଂଘ ଚାର୍ଟରକୁ ଉଲ୍ଲଂଘନ କରିଛି। ଇରାନର ନିଜକୁ ରକ୍ଷା କରିବାର ପୂର୍ଣ୍ଣ ଅଧିକାର ଅଛି ଏବଂ ଏହା ଉପରେ ଏପରି ଆକ୍ରମଣକୁ କୌଣସି ପ୍ରକାରେ ଯଥାର୍ଥ କରାଯାଇ ପାରିବ ନାହିଁ। ଏହା ଅନ୍ତର୍ଜାତୀୟ ନିୟମ ବିରୁଦ୍ଧରେ ଏକ ବିପଦପୂର୍ଣ୍ଣ ପଦକ୍ଷେପ।

ନିଜ ବୟାନ ପାକିସ୍ତାନ ସମସ୍ତ ଦେଶକୁ ନାଗରିକଙ୍କ ଜୀବନ ଏବଂ ସମ୍ପତ୍ତିକୁ ସମ୍ମାନ ଦେବାକୁ ଏବଂ ତୁରନ୍ତ ଯୁଦ୍ଧମୂଳକ କାର୍ଯ୍ୟ ବନ୍ଦ କରିବାକୁ ନିବେଦନ କରିଛି। ଏହା ସହିତ ସମସ୍ତ ପକ୍ଷଙ୍କୁ ଅନ୍ତର୍ଜାତୀୟ ଆଇନ, ବିଶେଷକରି ମାନବାଧିକାର ଆଇନ ପାଳନ କରିବାକୁ ପରାମର୍ଶ ଦିଆଯାଇଛି। ପାକିସ୍ତାନ ଗୁରୁତ୍ୱାରୋପ କରିଛି ଯେ ବର୍ତ୍ତମାନର ସଙ୍କଟର ସମାଧାନ କେବଳ ଆଲୋଚନା ଏବଂ କୂଟନୀତି ମାଧ୍ୟମରେ ସମ୍ଭବ ଏବଂ ଏଥିପାଇଁ ଜାତିସଂଘ ଚାର୍ଟରର ନୀତି ଅନୁସରଣ କରିବା ଆବଶ୍ୟକ।