ଇଦ ପାଇଁ ବନ୍ଦ ହେଲା ପାକିସ୍ତାନ ଓ ଆଫଗାନିସ୍ତାନ ଯୁଦ୍ଧ, ରହିଛି ଏହି ସର୍ତ୍ତ
ପାକିସ୍ତାନ ଏବଂ ଆଫଗାନିସ୍ତାନ ମଧ୍ୟରେ ବଢୁଥିବା ଉତ୍ତେଜନା ମଧ୍ୟରେ, ଉଭୟ ଦେଶ ଇଦ୍ ଉଲ୍-ଫିତର୍ ପାଇଁ ଏକ ଅସ୍ଥାୟୀ ଅସ୍ତ୍ରବିରତି ଘୋଷଣା କରିଛନ୍ତି। ସାଉଦି ଆରବ, ତୁର୍କୀ ଏବଂ କତାର ମଧ୍ୟସ୍ଥି ପାଲଟି ଅନୁରୋଧ କରିବାରୁ ଏହି ନିଷ୍ପତ୍ତି ନିଆଯାଇଛି। ଏହି ଘୋଷଣା ଏପରି ଏକ ସମୟରେ ଆସିଛି ଯେତେବେଳେ ଆଫଗାନିସ୍ତାନ ସରକାର କାବୁଲର ଏକ ନିଶା ନିବାରଣ ହସ୍ପିଟାଲ ଉପରେ ଆକ୍ରମଣ ପାଇଁ ପାକିସ୍ତାନକୁ ଦାୟୀ କରିଛନ୍ତି ।
ଯେଉଁଥିରେ ଶହ ଶହ ଲୋକଙ୍କ ମୃତ୍ୟୁ ହୋଇଥିବା ଦାବି କରାଯାଉଛି । ପାକିସ୍ତାନର ସୂଚନା ମନ୍ତ୍ରୀ, ଆତାଉଲ୍ଲାହ ତାରାର, ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ କହିଛନ୍ତି ଯେ ଇଦ୍କୁ ସମ୍ମାନ ଜଣାଇ ଏବଂ ବନ୍ଧୁତ୍ୱପୂର୍ଣ୍ଣ ଇସଲାମିକ୍ ଦେଶଗୁଡ଼ିକର ଅନୁରୋଧ ଆଧାରରେ ପାକିସ୍ତାନ ନିଜର ସାମରିକ ଅଭିଯାନ ଗଜବ୍-ଲିଲ୍-ହକ୍କୁ ଅସ୍ଥାୟୀ ଭାବରେ ବନ୍ଦ କରିବାକୁ ନିଷ୍ପତ୍ତି ନେଇଛି। ସେ ସ୍ପଷ୍ଟ କରିଛନ୍ତି, ଏହି ଅସ୍ତ୍ରବିରତି ୧୮-୧୯ ମାର୍ଚ୍ଚ ମଧ୍ୟରାତ୍ରିରୁ ଆରମ୍ଭ ହେବ ଏବଂ ୨୩-୨୪ ମାର୍ଚ୍ଚ ମଧ୍ୟରାତ୍ରି ପର୍ଯ୍ୟନ୍ତ ବଳବତ୍ତର ରହିବ। ଅତାଉଲ୍ଲାହ ତାରାର ଅସ୍ତ୍ରବିରତି ସହିତ ଆଫଗାନ ସରକାରଙ୍କୁ ଏକ ଚେତାବନୀ ଦେଇଛନ୍ତି । ସେ କହିଛନ୍ତି ଯେ, ଯଦି ଅସ୍ତ୍ରବିରତି ସମୟରେ ପାକିସ୍ତାନୀ ଅଞ୍ଚଳ ମଧ୍ୟରେ କୌଣସି ଆକ୍ରମଣ, ଡ୍ରୋନ୍ କାର୍ଯ୍ୟକଳାପ କିମ୍ବା ଆତଙ୍କବାଦୀ ଘଟଣା ଘଟେ, ତେବେ ତୁରନ୍ତ ଅଭିଯାନ ପୁଣି ଆରମ୍ଭ କରାଯିବ । ଏହାର କିଛି ସମୟ ପରେ, ଆଫଗାନିସ୍ତାନ ମଧ୍ୟ ସମାନ ଘୋଷଣା ଜାରି କରିଛି। ଆଫଗାନିସ୍ତାନ ସରକାରଙ୍କ ମୁଖପାତ୍ର ଜାବିଉଲ୍ଲାହ ମୁଜାହିଦ କହିଛନ୍ତି, ଇଦ୍ ଅଲ୍-ଫିତର୍କୁ ଦୃଷ୍ଟିରେ ରଖି ଆଫଗାନ ସୁରକ୍ଷା ବାହିନୀ ମଧ୍ୟ ଅସ୍ଥାୟୀ ଭାବରେ ସେମାନଙ୍କର ପ୍ରତିରକ୍ଷା ଅଭିଯାନକୁ ସ୍ଥଗିତ ରଖିବାକୁ ନିଷ୍ପତ୍ତି ନେଇଛନ୍ତି। ଯଦି କୌଣସି ବିପଦ ଉପୁଜେ, ତେବେ ଆଫଗାନିସ୍ତାନ ନିଜର ସୁରକ୍ଷା ପାଇଁ କଡ଼ା ଜବାବ ଦେବ।
Click it and Unblock the Notifications
Sign in with Google