ସୁଦାନରେ ଅର୍ଦ୍ଧସାମରିକ ବାହିନୀ ଆକ୍ରମଣରେ ୧୧୪ ମୃତ

ସୁଦାନର ଉତ୍ତର ଦାରଫୁର ଅଞ୍ଚଳର ରାଜଧାନୀ ଏଇଫାସରଠାରେ ଥିବା ୨ଟି ଥଇଥାନ ଶିବିର ଉପରେ ଅର୍ଦ୍ଧସାମରିକ ବାହିନୀ ତ୍ୱରିତ ସହାୟକ ଫୋର୍ସର ଆକ୍ରମଣ ଦ୍ୱାରା ୧୧୪ରୁ ଅଧିକ ସାଧାରଣ ନାଗରିକଙ୍କର ମୃତ୍ୟୁ ହୋଇଛି । ଅଧିକାରୀଙ୍କ ସୂତ୍ରରୁ ମିଳିଥିବା ସୂଚନା ଅନୁଯାୟୀ ଗତ ଶୁକ୍ରବାର ଜାମ୍‍ଜାମ୍‍ ଥଇଥାନ ଶିବିରରେ ହୋଇଥିବା ଆକ୍ରମଣରେ ୧୦୦ରୁ ଅଧିକ ଲୋକଙ୍କର ମୃତ୍ୟୁ ଘଟିଥିବାବେଳେ ଗତକାଲି ଆବୁସୌକ୍‍ ଶିବିର ଉପରେ ପୃଥକ୍‍ ମିଲିସିଆ ଆକ୍ରମଣ ଯୋଗୁଁ ୧୪ଜଣ ନିହତ ହୋଇଛନ୍ତି ।

ଜାମ୍‍ଜାମ୍‍ କ୍ୟାମ୍ପରେ କାର୍ଯ୍ୟରତ ଥିବା ବେସରକାରୀ ସହାୟକ ସଂସ୍ଥାର ୯ଜଣ କର୍ମଚାରୀଙ୍କର ମଧ୍ୟ ଏହି ଆକ୍ରମଣରେ ମୃତ୍ୟୁହୋଇଥିବା ଜଣାପଡିଚି । ଅର୍ଦ୍ଧସାମରିକ ତ୍ୱରିତ ସହାୟକ ଫୋର୍ସ ପକ୍ଷରୁ ଏ ସମ୍ପର୍କରେ କୌଣସି ମନ୍ତବ୍ୟ ଦିଆଯାଇ ନାହିଁ । ଗତବର୍ଷ ମେ' ମାସ ୧୦ ତାରିଖ ପରେ ସୁଦାନି ସଶସ୍ତ୍ରବାହିନୀ ଏବଂ ଅର୍ଦ୍ଦସାମରିକ ବାହିନୀ ମଧ୍ୟରେ ଏହା ସବୁଠାରୁ ଭୟଙ୍କର ସଂଘର୍ଷ ବୋଲି ଜଣାପଡିଛି । ୨୦୨୩ ଏପ୍ରିଲ ମଧ୍ୟଭାଗରୁ ସୁଦାନରେ ଏହି ଦୁଇପକ୍ଷଙ୍କ ମଧ୍ୟରେ ଘଟିଥିବା ସଂଘର୍ଷରେ ଏପର୍ଯ୍ୟନ୍ତ ୨୯ହଜାର ୬୦୦ରୁ ଅଧିକ ଲୋକଙ୍କର ମୃତ୍ୟୁ ହୋଇଥିବା ଜଣାପଡିଛି ।