ବଡ଼ ବୟାନ ଦେଲେ ବିଲାଓ୍ବଲ ଭୁଟ୍ଟୋ, କହିଲେ ଭାରତ.....

ପାକିସ୍ତାନର ପୂର୍ବତନ ବୈଦେଶିକ ମନ୍ତ୍ରୀ ବିଲାୱଲ ଭୁଟ୍ଟୋ ଜର୍ଦ୍ଦାରୀ ଜୈଶ-ଏ-ମହମ୍ମଦ ମୁଖ୍ୟ ମାସୁଦ ଆଝାରଙ୍କ ବିଷୟରେ ଏକ ବିଭ୍ରାନ୍ତିକର ବୟାନ ଦେଇଛନ୍ତି। ଯାହାକୁ ନେଇ ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ଶରିଫ୍‌ ମୁଣ୍ଡରେ ହାତ ଦେବେ।

ଭାରତ ଅନେକ ଥର ପ୍ରମାଣ ଦେଇଛି ଯେ, ଜୈଶ-ଏ-ମହମ୍ମଦ (JEM)ର ମୁଖ୍ୟାଳୟ ପାକିସ୍ତାନର ବାହାୱଲପୁରରେ ଅଛି। ପାକିସ୍ତାନର ପ୍ରାୟ ପ୍ରତ୍ୟେକ ବ୍ୟକ୍ତି ଜାଣିଥିବେ ଯେ, ମାସୁଦ ଆଝାର କେଉଁଠି ଲୁଚି ରହିଛି, କିନ୍ତୁ ବିଲାୱଲ ଭୁଟ୍ଟୋ କହିଛନ୍ତି ଯେ, ଆମେ ଜାଣିନାହୁଁ ଯେ ମାସୁଦ ଆଝାର କେଉଁଠି।

ଏକ ସାକ୍ଷାତକାରରେ ବିଲାୱଲ ଭୁଟ୍ଟୋ କହିଥିଲେ, ଯଦି ଭାରତ ସୂଚନା ଦିଏ ଯେ ସେ (ମାସୁଦ ଆଝାର) ପାକିସ୍ତାନୀ ମାଟିରେ ଅଛନ୍ତି, ତେବେ ପାକିସ୍ତାନ ତାଙ୍କୁ ଗିରଫ କରିବାରେ ଖୁସି ଅନୁଭବ କରିବ। କାରଣ ଆମେ ତାଙ୍କୁ ଖୋଜି ପାଉନୁ। ଗତ ବର୍ଷ ହିଁ, ମାସୁଦ ଆଝାରଙ୍କୁ ବାହାୱଲପୁରରେ ଏକ କାର୍ଯ୍ୟକ୍ରମରେ ମୁକ୍ତ ଭାବରେ ବୁଲୁଥିବା ଏବଂ ଭାରତ ବିରୋଧରେ ବିଷ ଓଗାଳିଥିବା ଦେଖାଯାଇଥିଲା।

'ଡନ୍‌' ଖବରକାଗଜ ଅନୁସାରେ, ଲସ୍କର-ଏ-ତୈବା ମୁଖ୍ୟ ହାଫିଜ୍ ସଇଦ ଏବଂ ଜୈଶ-ଏ-ମହମ୍ମଦ ମୁଖ୍ୟ ମାସୁଦ ଆଝହର ଭଳି ଆତଙ୍କବାଦୀଙ୍କୁ ଭାରତକୁ ହସ୍ତାନ୍ତର କରିବାର ସମ୍ଭାବନା ବିଷୟରେ ପଚରାଯିବାରୁ, ବିଲାୱାଲ କହିଛନ୍ତି ଯେ ଯଦି ଏହି ପ୍ରକ୍ରିୟା ଭାରତ ଏବଂ ପାକିସ୍ତାନ ମଧ୍ୟରେ ଏକ ବ୍ୟାପକ ଆଲୋଚନାର ଅଂଶ ହୋଇଯାଏ, ତେବେ ପାକିସ୍ତାନ ଏଥିରୁ ପଛକୁ ହଟିବ ନାହିଁ।' ଭୁଟ୍ଟୋ କହିଛନ୍ତି,'ଆତଙ୍କବାଦ ଏକ ଏପରି ପ୍ରସଙ୍ଗ, ଯାହାକୁ ନେଇ ଭାରତ ଓ ପାକିସ୍ତାନ ଉଭୟ ଏକଠି ବସି ଆଲୋଚନା କରିବା ଆବଶ୍ୟକ।

ଯଦି ଭାରତ ଏହି ପ୍ରକ୍ରିୟାରେ ସହଯୋଗ କରେ, ତେବେ ପାକିସ୍ତାନର କୌଣସି 'ତଦନ୍ତାଧୀନ ବ୍ୟକ୍ତି'ଙ୍କୁ ହସ୍ତାନ୍ତର କରିବାରେ କୌଣସି ଆପତ୍ତି ରହିବ ନାହିଁ।" ବିଲାୱଲ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ ପାକିସ୍ତାନରେ ସୟିଦ ଏବଂ ଆଝହର ବିରୁଦ୍ଧରେ ପଞ୍ଜିକୃତ ମାମଲାଗୁଡ଼ିକ ଆତଙ୍କବାଦ ପାଣ୍ଠି ସହିତ ଜଡ଼ିତ, ଯାହାର ବିଚାର ମଧ୍ୟ ଚାଲିଛି। ସେ ଏହା ମଧ୍ୟ କହିଛନ୍ତି ଯେ ଭାରତ ମୌଳିକ ଆଇନଗତ ପ୍ରକ୍ରିୟା ଶେଷ କରିନାହିଁ, ଏହା ବିନା ସୀମାପାର କାର୍ଯ୍ୟକଳାପ ପାଇଁ ଏହି ଆତଙ୍କବାଦୀମାନଙ୍କୁ ଦୋଷୀ ସାବ୍ୟସ୍ତ କରିବା କଷ୍ଟକର।'

ସେ କହିଛନ୍ତି, "ଭାରତ ଏପର୍ଯ୍ୟନ୍ତ ପ୍ରମାଣ, ସାକ୍ଷୀ ଏବଂ ଆଇନଗତ ସମର୍ଥନ ଯୋଗାଇ ଦେଇନାହିଁ। ଯେପର୍ଯ୍ୟନ୍ତ ଭାରତ ଏହା କରିନାହିଁ, ବିଚାର ଏବଂ ଦୋଷୀ ସାବ୍ୟସ୍ତ ହେବା କଷ୍ଟକର ରହିବ।" ବିଲାୱଲ ଏହା ମଧ୍ୟ କହିଛନ୍ତି ଯେ ପାକିସ୍ତାନ ହାଫିଜ୍ ସଇଦକୁ ପୂର୍ବରୁ ଦଣ୍ଡ ଦେଇସାରିଛି ଏବଂ ସେ ବର୍ତ୍ତମାନ ଜେଲରେ ଅଛି। ସେହି ସମୟରେ, ପାକିସ୍ତାନର କହିବା କ‌‌ଥା ହେଲା, ମସୁଦ ଆଝହର ବର୍ତ୍ତମାନ ଆଫଗାନିସ୍ତାନରେ ଲୁଚି ରହିଛି।

ବିଲାଓ୍ବଲ ଏହା ମଧ୍ୟ ମନ୍ତବ୍ୟ ଦେଇଛନ୍ତି ଯେ ଆତଙ୍କବାଦୀଙ୍କୁ ଧରିବା ପାଇଁ ଭାରତର ଏକପାଖିଆ କାର୍ଯ୍ୟାନୁଷ୍ଠାନ ଏକ "ନୂଆ ଅସ୍ୱାଭାବିକତା" ପାଲଟିଛି, ଯାହାକି ନା ଭାରତ ନା ପାକିସ୍ତାନର ସ୍ୱାର୍ଥରେ ରହିଛି। ବିଲାୱଲଙ୍କ ଏହି ବୟାନ ଏପରି ସମୟରେ ଆସିଛି ଯେତେବେଳେ ଦୁଇ ଦେଶ ମଧ୍ୟରେ ସମ୍ପର୍କ ଦୀର୍ଘ ସମୟ ଧରି ତିକ୍ତ ରହିଛି ଏବଂ ଭାରତ ୨୬/୧୧ ମୁମ୍ବାଇ ଆକ୍ରମଣର ମୁଖ୍ୟ ଷଡ଼ଯନ୍ତ୍ରକାରୀ ସମ୍ପର୍କରେ ପାକିସ୍ତାନଠାରୁ କଠୋର କାର୍ଯ୍ୟାନୁଷ୍ଠାନ ଏବଂ ପ୍ରତ୍ୟର୍ପଣ ଦାବି କରିଆସୁଛି।