‘ଏକ୍ସ’ କୁ କର୍ଣ୍ଣାଟକ ହାଇକୋର୍ଟରୁ ମିଳିଲା ଝଟକା, କହଲେ ଭାରତୀୟ ଆଇନ ପାଳନ କରିବା ପାଇଁ....

ସୋସିଆଲ ମିଡିଆ ପ୍ଲାଟଫର୍ମ X କୁ କର୍ଣ୍ଣାଟକ ହାଇକୋର୍ଟରୁ ମିଳିଲା ଝଟକା । କୋର୍ଟ କେନ୍ଦ୍ର ସରକାରଙ୍କ ଟେକଡାଉନ ନିର୍ଦ୍ଦେଶକୁ ଚ୍ୟାଲେଞ୍ଜ କରି Xଙ୍କ ଆବେଦନକୁ ଖାରଜ କରିଦେଇଛି। କୋର୍ଟ ସ୍ପଷ୍ଟ ଭାବରେ କହିଛନ୍ତି ଯେ, "ଭାରତରେ କାର୍ଯ୍ୟ କରିବା ପାଇଁ ସୋସିଆଲ ମିଡିଆ ପ୍ଲାଟଫର୍ମଗୁଡ଼ିକୁ ଭାରତୀୟ ଆଇନ ପାଳନ କରିବାକୁ ପଡିବ"।

ନିକଟରେ କେନ୍ଦ୍ର ସରକାର Xଙ୍କୁ କିଛି ଆକାଉଣ୍ଟ ଏବଂ ପୋଷ୍ଟକୁ ଅବରୋଧ କରିବାକୁ ନିର୍ଦ୍ଦେଶ ଦେଇଥିଲେ, କିନ୍ତୁ ଏଲନ ମସ୍କଙ୍କ କମ୍ପାନୀ ଏହି ନିର୍ଦ୍ଦେଶକୁ ଚ୍ୟାଲେଞ୍ଜ କରି କର୍ଣ୍ଣାଟକ ହାଇକୋର୍ଟର ଦ୍ୱାରସ୍ଥ ହୋଇଥିଲା । X କୋର୍ଟରେ ଯୁକ୍ତି ଦର୍ଶାଇଥିଲେ ଯେ, ଏହା ଆମେରିକୀୟ ଆଇନ ଅନୁଯାୟୀ କାର୍ଯ୍ୟ କରେ ଏବଂ ଅଭିବ୍ୟକ୍ତିର ସ୍ୱାଧୀନତାର ଅଧିକାର ରହିଛି । ତେଣୁ, ଏହାକୁ ଭାରତ ସରକାରଙ୍କ ଟେକଡାଉନ ନିର୍ଦ୍ଦେଶ ପାଳନ କରିବାକୁ ପଡିବ ନାହିଁ ।

ଏହାର ଜବାବରେ, ସରକାର କହିଥିଲେ ଯେ ଧାରା 19(2) କେବଳ ଭାରତୀୟ ନାଗରିକଙ୍କ ପାଇଁ ମତାମତ ସ୍ୱାଧୀନତା ପ୍ରଦାନ କରେ । ବିଦେଶୀ କମ୍ପାନୀ କିମ୍ବା ଅଣନାଗରିକଙ୍କ ପାଇଁ ନୁହେଁ । କେନ୍ଦ୍ର ସରକାର କହିଥିଲେ ଯେ ସୋସିଆଲ ମିଡିଆ ପ୍ଲାଟଫର୍ମଗୁଡ଼ିକ ଦେଶର ଆଇନ ଏବଂ ନିୟମାବଳୀ ପାଳନ କରିବା ଆବଶ୍ୟକ ।

କର୍ଣ୍ଣାଟକ ହାଇକୋର୍ଟ କହିଛନ୍ତି ଯେ, ଆଜି ସୋସିଆଲ ମିଡିଆ ନିୟନ୍ତ୍ରଣ ଆବଶ୍ୟକ ଏବଂ କମ୍ପାନୀ ଗୁଡ଼ିକୁ ନିୟନ୍ତ୍ରଣ ବିନା କାର୍ଯ୍ୟ କରିବାକୁ ଅନୁମତି ଦିଆଯାଇ ପାରିବ ନାହିଁ। ରାୟ ଶୁଣାଇ ଜଷ୍ଟିସ୍ ଏମ୍. ନାଗପ୍ରସନ୍ନାଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ କହିଛନ୍ତି, "ସୂଚନା ଏବଂ ଯୋଗାଯୋଗକୁ କେବେବି ଅନିୟନ୍ତ୍ରିତ କରାଯାଇନାହିଁ। ପ୍ରଯୁକ୍ତିବିଦ୍ୟା ଆଗକୁ ବଢ଼ିବା ସହିତ, ନିୟନ୍ତ୍ରଣ ଏବଂ ନିୟମାବଳୀ ମଧ୍ୟ କାର୍ଯ୍ୟକାରୀ ହୋଇଛି।"

କୋର୍ଟ କହିଛନ୍ତି,"ନ୍ୟାୟିକ ସୁରକ୍ଷା ଚାହୁଁଥିବା ଯେକୌଣସି ନାଗରିକ ରାଷ୍ଟ୍ରର ନାଗରିକ ହେବା ଉଚିତ। ସାମାଜିକ ଗଣମାଧ୍ୟମକୁ ଅରାଜକ ସ୍ୱାଧୀନତା ପାଇଁ ଛାଡ଼ି ଦିଆଯାଇ ପାରିବ ନାହିଁ। ପ୍ରତ୍ୟେକ ସାର୍ବଭୌମ ରାଷ୍ଟ୍ର ସାମାଜିକ ଗଣମାଧ୍ୟମକୁ ନିୟନ୍ତ୍ରଣ କରେ। କୌଣସି ପ୍ଲାଟଫର୍ମ ଭାରତୀୟ ବଜାରରେ କେବଳ ଖେଳ ପଡ଼ିଆ ଭାବରେ କାର୍ଯ୍ୟ କରିପାରିବ ନାହିଁ।"