ସିରିଆ ଉପରେ ଇସ୍ରାଏଲର ବଡ଼ ଧରଣର ଆକ୍ରମଣ

ଅମ୍ମାନ: ସିରିଆର ରାଷ୍ଟ୍ରପତି ବାଶାର ଅଲ-ଅସାଦ ଦେଶ ଛାଡି ପଳାଇବା ପରେ ଇସ୍ରାଏଲ ସିରିଆ ଉପରେ ଏକ ବଡ଼ ଆକ୍ରମଣ କରିଥିଲା। ସୂଚନାନୁସାରେ, ଏୟାର ଷ୍ଟ୍ରାଇକରେ ସିରିଆ ସେନାର ତିନୋଟି ପ୍ରମୁଖ ଏୟାରବେସକୁ ଇସ୍ରାଏଲ ଟାର୍ଗେଟ କରିଛି। ଏହି ବିସ୍ଫୋରଣରେ ଡଜନେ ହେଲିକପ୍ଟର ଏବଂ ଜେଟ ବିମାନ କ୍ଷତିଗ୍ରସ୍ତ ହୋଇଛି।

ବଶର ଅଲ-ଅସଦ ସରକାରଙ୍କ ପତନ ପରେ ସିରିଆ ସେନାର ଅସ୍ତ୍ରଶସ୍ତ୍ର ଆତଙ୍କବାଦୀ ଗୋଷ୍ଠୀଙ୍କ ହାତରେ ପଡିବାର ଆଶଙ୍କା ରହିଛି। ଏହି ସମୟରେ ଆମେରିକା ଏବଂ ତୁର୍କୀ ମଧ୍ୟ ସେମାନଙ୍କର ଲକ୍ଷ୍ୟ ହାସଲ କରିବା ପାଇଁ ବାୟୁ ଏବଂ ସ୍ଥଳ ଆକ୍ରମଣ କରିଥିଲେ। ମାନବ ଅଧିକାର ପାଇଁ ସିରିଆର ପର୍ଯ୍ୟବେକ୍ଷକ ଅନୁଯାୟୀ ଇସ୍ରାଏଲ୍ ସିରିଆରେ ୧୦୦ରୁ ଅଧିକ ଏୟାର ଷ୍ଟ୍ରାଇକ୍ କରିଛି।

ଏହି ଆକ୍ରମଣରେ ବାରାଜ ବୈଜ୍ଞାନିକ ଅନୁସନ୍ଧାନ କେନ୍ଦ୍ର ସମେତ ଅନେକ ଉଚ୍ଚ ମୂଲ୍ୟର ଲକ୍ଷ୍ୟଭେଦ କରିବା ଲାଗି ଟାର୍ଗେଟ କରାଯାଇଥିଲା। ଇସ୍ରାଏଲର ବୈଦେଶିକ ମନ୍ତ୍ରୀ ଗିଦିୟନ୍ ସାର ନିଶ୍ଚିତ କରିଛନ୍ତି ଯେ, ରାସାୟନିକ ଅସ୍ତ୍ରଶସ୍ତ୍ର ଏବଂ ଦୂରଗାମୀ କ୍ଷେପଣାସ୍ତ୍ର ନଷ୍ଟ କରିବା ଏହି ଆକ୍ରମଣର ଉଦ୍ଦେଶ୍ୟ। ଇସ୍ରାଏଲ ଭୟ କରୁଛି ଯେ, ଏହି ଅସ୍ତ୍ରଶସ୍ତ୍ରଗୁଡିକ ଆତଙ୍କବାଦୀ ଗୋଷ୍ଠୀଙ୍କ ହାତରେ ପଡିପାରେ। ଇସ୍ରାଏଲ୍ ନିକଟରେ ଗୋଲାନ୍ ହାଇଟ୍ସ ବଫର୍ ଜୋନ୍ ଦଖଲ କରିଛି।

ସେହିପରି ଆମେରିକା ମଧ୍ୟ ସିରିଆରେ ଆତଙ୍କବାଦୀ ସଂଗଠନ ଆଇଏସଆଇଏସର ଶିବିର ଉପରେ ୭୫ ଏୟାର ଷ୍ଟ୍ରାଇକ୍ କରିଛି ଏବଂ ଆମେରିକାର ସେଣ୍ଟ୍ରାଲ କମାଣ୍ଡ ଅନୁଯାୟୀ ଏହା ବି-୫୧ ବୋମା ବର୍ଷଣକାରୀ ଏବଂ ଏଫ-୧୫ଇ ଯୁଦ୍ଧ ବିମାନ ବ୍ୟବହାର କରି ଏହି ଆକ୍ରମଣ କରିଛି। ଏହି ଆକ୍ରମଣରେ ଅନେକ ଆଇଏସଆଇଏସ ସଦସ୍ୟ ଏବଂ ସେମାନଙ୍କର ବେସ୍ ନଷ୍ଟ ହୋଇଯାଇଛି।

ଇସ୍ରାଏଲର ପ୍ରତିରକ୍ଷା ମନ୍ତ୍ରୀ ଇସ୍ରାଏଲ କାଟଜ କହିଛନ୍ତି ଯେ ସେନା ସମଗ୍ର ସିରିଆରେ ଭାରି ରଣନୀତିକ ଅସ୍ତ୍ର ନଷ୍ଟ କରିବ। ଭୂପୃଷ୍ଠରୁ ବାୟୁ କ୍ଷେପଣାସ୍ତ୍ର, ବାୟୁ ପ୍ରତିରକ୍ଷା ପ୍ରଣାଳୀ, ଭୂପୃଷ୍ଠରୁ ଭୂପୃଷ୍ଠ କ୍ଷେପଣାସ୍ତ୍ର, କ୍ରୁଜ କ୍ଷେପଣାସ୍ତ୍ର, ଦୂର ଦୂରଗାମୀ ରକେଟ ଏବଂ ଉପକୂଳ କ୍ଷେପଣାସ୍ତ୍ର ମଧ୍ୟ ନଷ୍ଟ ହୋଇଯିବ।