ଆମେରିକାକୁ ଘାରିଛି ଇରାନ ଆକ୍ରମଣ ଭୟ, ନିଜ ନାଗରିକଙ୍କୁ କରାଇଲା ସତର୍କ
ଇରାନ ସହିତ ବଢ଼ୁଥିବା ଉତ୍ତେଜନା ମଧ୍ୟରେ ଆମେରିକା ନିଜ ନାଗରିକମାନଙ୍କ ପାଇଁ ଏକ ନୂଆ ଆଡଭାଇଜରି ଜାରି କରିଛି। ଯେଉଁଥିରେ ଦେଶ ମଧ୍ୟରେ "ସମ୍ଭାବ୍ୟ ଆକ୍ରମଣ ତଥା ହିଂସା" ବିଷୟରେ ଚେତାବନୀ ଦିଆଯାଇଛି। ଆମେରିକାର ଗୃହ ସୁରକ୍ଷା ବିଭାଗ (ଡିଏଚଏସ) ଦ୍ୱାରା ଏହା ଜାରି କରାଯାଇଛି।
ଇରାନର ତିନୋଟି ପ୍ରମୁଖ ପରମାଣୁ ସ୍ଥାନ ଉପରେ ଆମେରିକାର ସେନା ଆକ୍ରମଣ କରିବାର ଗୋଟିଏ ଦିନ ପରେ ଏହା କୁହାଯାଇଛି। ତେବେ ଦେଶ ଭିତରେ ସାଇବର ଆକ୍ରମଣ, ପ୍ରତିଶୋଧମୂଳକ ହିଂସା ଏବଂ ଘରୋଇ ଉଗ୍ରବାଦୀ କାର୍ଯ୍ୟକଳାପ ହୋଇପାରେ।
ସୂଚନା ଅନୁଯାୟୀ, ଇରାନ ସମର୍ଥକ ହ୍ୟାକ୍ଟିଭିଷ୍ଟଙ୍କ ଦ୍ୱାରା ଆମେରିକୀୟ ନେଟୱାର୍କ ବିରୁଦ୍ଧରେ ନିମ୍ନ ସ୍ତରୀୟ ସାଇବର ଆକ୍ରମଣ ହେବାର ସମ୍ଭାବନା ଅଛି। ଇରାନ ସରକାରଙ୍କ ସହ ଜଡିତ ସାଇବର ହ୍ୟାକର୍ସ ଆମେରିକୀୟ ନେଟୱାର୍କକୁ ଆଟାକ କରିପାରନ୍ତି ବୋଲି ଡିଏଚଏସ ବୁଲେଟିନରେ କୁହାଯାଇଛି।
ଉଲ୍ଲେଖଯୋଗ୍ୟ, ଆମେରିକା ଇରାନର ତିନୋଟି ପରମାଣୁ ପ୍ଲାଣ୍ଟ ଉପରେ ବୋମା ପକାଇଛି। ଆମେରିକାର ଆକ୍ରମଣ ପରେ, ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି ଯେ ଆକ୍ରମଣଗୁଡ଼ିକ ଇରାନର ତିନୋଟି ପରମାଣୁ ସମୃଦ୍ଧ ପ୍ଲାଣ୍ଟକୁ "ସମ୍ପୂର୍ଣ୍ଣ ଭାବରେ ଧ୍ୱଂସ" କରିଛି। ତଥାପି, ସାଟେଲାଇଟ୍ ଚିତ୍ର ଏପର୍ଯ୍ୟନ୍ତ ଏହି ଦାବିକୁ ନିଶ୍ଚିତ କରିନାହିଁ। ଯଦିଓ ପରମାଣୁ ସ୍ଥଳଗୁଡ଼ିକରେ ବହୁତ କ୍ଷତି ଦେଖାଯାଉଛି, ତଥାପି କିଛି ଅଂଶ ସୁରକ୍ଷିତ ଅଛି। ଇରାନର ଭୂତଳ ପରମାଣୁ ସ୍ଥାପନ ଉପରେ ଆମେରିକାର ଆକ୍ରମଣ କେତେ ପ୍ରଭାବ ପକାଇଛି ସେ ବିଷୟରେ ଅନିଶ୍ଚିତତା ରହିଛି।
Click it and Unblock the Notifications
Sign in with Google