ହିନ୍ଦୁ ଭିକ୍ଷୁ ଚିନ୍ମୟ ଦାସଙ୍କ ଗିରଫଦାରୀକୁ ତୀବ୍ର ନିନ୍ଦା କଲେ ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନା

ନୂଆଦିଲ୍ଲୀ: ଦେଶଦ୍ରୋହ ଅଭିଯୋଗରେ ହିନ୍ଦୁ ସନ୍ଥ ଚିନ୍ମୟ କୃଷ୍ଣ ଦାସଙ୍କ ଗିରଫଦାରୀକୁ ତୀବ୍ର ନିନ୍ଦା କରିଛନ୍ତି ବାଂଲାଦେଶ ପ୍ରଧାନମନ୍ତ୍ରୀ ଶେଖ ହସିନା । ଚିନ୍ମୟ କୃଷ୍ଣଙ୍କୁ ତୁରନ୍ତ ମୁକ୍ତ କରିବାକୁ ସେ ଦାବି କରିଛନ୍ତି। ପୂର୍ବତନ ପ୍ରଧାନମନ୍ତ୍ରୀ କହିଛନ୍ତି ଯେ, ସନାତନ ଧର୍ମ ସମ୍ପ୍ରଦାୟର ଜଣେ ବରିଷ୍ଠ ନେତାଙ୍କୁ ଅନ୍ୟାୟ ଭାବରେ ଗିରଫ କରାଯାଇଛି ଏବଂ ତାଙ୍କୁ ତୁରନ୍ତ ମୁକ୍ତ କରାଯିବା ଉଚିତ। ଚଟଗାଓଁରେ ଏକ ମନ୍ଦିରକୁ ଜଳାଯାଇଛି। ଏହାପୂର୍ବରୁ ଅହମ୍ମଦିଆ ସମ୍ପ୍ରଦାୟର ମସଜିଦ, ଦରଗା, ଚର୍ଚ୍ଚ, ମଠ ଏବଂ ଘର ଉପରେ ଆକ୍ରମଣ, ଭଙ୍ଗାରୁଜା, ଲୁଟ୍ ଓ ନିଆଁ ଲଗାଇ ଦିଆଯାଇଥିଲା । ସମସ୍ତ ସମ୍ପ୍ରଦାୟର ଲୋକଙ୍କ ପାଇଁ ଧାର୍ମିକ ସ୍ୱାଧୀନତା ଏବଂ ଜୀବନ ଏବଂ ସମ୍ପତ୍ତିର ସୁରକ୍ଷା ନିଶ୍ଚିତ ହେବା ଉଚିତ୍ ବୋଲି ସେ କହିଛନ୍ତି ।

ସେ କହିଛନ୍ତି ଯେ ଚଟଗାଁଓରେ ଜଣେ ଓକିଲଙ୍କୁ ହତ୍ୟା କରାଯାଇଛି, ଏହି ହତ୍ୟାକାଣ୍ଡକୁ ତୀବ୍ର ବିରୋଧ କରାଯାଇଛି। ଏହି ହତ୍ୟାକାଣ୍ଡରେ ସମ୍ପୃକ୍ତ ଥିବା ଲୋକଙ୍କୁ ଯଥାଶୀଘ୍ର ଦଣ୍ଡ ଦିଆଯିବା ଉଚିତ୍‌। ଏହି ଘଟଣା ମାନବିକ ଅଧିକାରର ଚରମ ଉଲ୍ଲଂଘନ କରିଛି। ଜଣେ ଓକିଲ ତାଙ୍କର ବୃତ୍ତିଗତ କାର୍ଯ୍ୟ କରିବାକୁ ଯାଇଥିଲେ ଏବଂ ଆତଙ୍କବାଦୀମାନେ ତାଙ୍କୁ ପିଟିପିଟି ହତ୍ୟା କରିଥିଲେ। ସେମାନେ ଯିଏ, ସେମାନଙ୍କୁ ଦଣ୍ଡ ଦିଆଯିବା ଉଚିତ୍‌।

ଶେଖ ହସିନା କହିଛନ୍ତି ଯେ ଯଦି ଅସାମ୍ବିଧାନିକ ଭାବରେ କ୍ଷମତା ହାସଲ କରିଥିବା ୟୁନୁସ ସରକାର ଏହି ଆତଙ୍କବାଦୀଙ୍କୁ ଦଣ୍ଡ ଦେବାରେ ବିଫଳ ହୁଅନ୍ତି, ତେବେ ମାନବିକ ଅଧିକାରର ଉଲ୍ଲଂଘନ ପାଇଁ ମଧ୍ୟ ତାଙ୍କୁ ଦଣ୍ଡ ଭୋଗିବାକୁ ପଡିବ। ଏହିପରି ଆତଙ୍କବାଦ ଏବଂ ଉଗ୍ରବାଦ ବିରୋଧରେ ଏକଜୁଟ ହେବାକୁ ମୁଁ ଦେଶର ଲୋକଙ୍କୁ ନିବେଦନ କରୁଛି। ସାଧାରଣ ଲୋକଙ୍କ ଜୀବନ ଏବଂ ସମ୍ପତ୍ତିର ସୁରକ୍ଷା ନିଶ୍ଚିତ କରିବା ଜରୁରୀ ଅଟେ।

ସେ ଆହୁରି ମଧ୍ୟ କହିଛନ୍ତି ଯେ ବର୍ତ୍ତମାନର ଶାସକମାନେ ସବୁ କ୍ଷେତ୍ରରେ ବିଫଳ ହୋଇଥିବା ଜଣାପଡିଛି। ଅତ୍ୟାବଶ୍ୟକ ମୂଳକୁ ନିୟନ୍ତ୍ରଣ କରିବାରେ ବିଫଳ, ମାନବ ଜୀବନକୁ ସୁରକ୍ଷା ଯୋଗାଇବାରେ ବିଫଳ। ସାଧାରଣ ଲୋକଙ୍କ ଉପରେ ପ୍ରତ୍ୟକ୍ଷ ଏବଂ ପରୋକ୍ଷ ଭାବରେ ଏହି ଅତ୍ୟାଚାର କରାଯାଉଥିବା ମୁଁ ଦୃଢ ନିନ୍ଦା କରୁଛି।