ବିରାଟ, ସଚିନଙ୍କ ସମେତ ଏହି ସବୁ ସେଲିବ୍ରେଟିଙ୍କ ଟ୍ୱିଟର ଆକାଉଣ୍ଟକୁ ଫେରିଲା ବ୍ଲୁ-ଟିକ୍

Published: Sunday, April 23, 2023, 20:50 [IST]

ମୁମ୍ବାଇ: ଗତ ଗୁରୁବାର ଦିନ ମାଇକ୍ରୋବ୍ଲଗିଂ ପ୍ଲାଟଫର୍ମ ଟ୍ୱିଟର ଏହାର ବ୍ଲୁ ଟିକ୍ ସବସ୍କ୍ରିପସନ ନିୟମ ଲାଗୁ କରିଥିଲା । ଯାହା ଫଳରେ ଅନେକ ଅନପେଡ ସେଲିବ୍ରେଟିଙ୍କ ଆକାଉଣ୍ଟରୁ ଟ୍ୱିଟର ବ୍ଲୁ ଟିକ୍ ହଟି ଯାଇଥିଲା ।

ଟ୍ୱିଟର ଏହାର ଘୋଷଣାରେ କହିଛି ଯେ ଯାଞ୍ଚ ହୋଇଥିବା ଆକାଉଣ୍ଟରୁ ଫ୍ରୀ ବ୍ଲ୍ୟୁ ଟିକ୍ ହଟାଇ ଦିଆଯାଇଛି । ଏଲନ୍‌ ମସ୍କଙ୍କ ମାଲିକାନାରେ ଥିବା ସୋସିଆଲ୍ ମିଡିଆ ପ୍ଲାଟଫର୍ମରେ ଶାହାରୁଖ ଖାନ, ଆଲିଆ ଭଟ୍ଟଙ୍କ ପରି ଅନେକ ବଲିଉଡ ତାରକା ମଧ୍ୟ ବ୍ଲୁ ଟିକ୍ ହରାଇଛନ୍ତି । ସେହିପରି ରାଜନେତା ଯୋଗୀ ଆଦିତ୍ୟନାଥ, ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀଙ୍କ ସହ କ୍ରିକେଟର୍ ବିରାଟ କୋହଲି, ରୋହିତ ଶର୍ମା ମଧ୍ୟ ଟ୍ୱିଟରର ଏହି ସୁବିଧାରୁ ବାଦ ପଡିଛନ୍ତି । ଅନପେଡ୍ ଆକାଉଣ୍ଟରୁ ବ୍ଲୁ ଟିକ୍ ହଟାଇବା ନେଇ ଏଲୋନ୍ ମସ୍କ ପୂର୍ବରୁ ଘୋଷଣା କରିଥିଲେ ।

ହେଲେ ଏବେ କିଛି ସେଲିବ୍ରିଟିଙ୍କ ଆକାଉଣ୍ଟକୁ ପୁଣି ଫେରିଛି ବ୍ଲୁ-ଟିକ୍ । ଗଡ ଅଫ୍ କ୍ରିକେଟ ସଚିନ ତେନ୍ଦୁଲକର ଓ ଟିମ୍ ଇଣ୍ଡିଆର ପୂର୍ବତନ ଅଧିନାୟକ ବିରାଟ କୋହଲିଙ୍କ ଆକାଉଣ୍ଟରେ ଏବେ ପୂର୍ବଭଳି ବ୍ଲୁ-ଟିକ୍ ମାର୍କ ରହିଥିବା ଦେଖିବାକୁ ମିଳିଛି । ସେହିଭଳି ଶାହାରୁଖ ଖାନଙ୍କ ଆକାଉଣ୍ଟରେ ମଧ୍ୟ ବ୍ଲୁ-ଟିକ୍ ପୁଣି ଫେରିଛି । ହେଲେ ଏହି ସେଲିବ୍ରିଟିମାନେ ବ୍ଲୁ-ଟିକ୍ ସବସ୍କ୍ରାଇବ୍ କରିଛନ୍ତି, ନା କମ୍ପାନୀ ତାଙ୍କ ଅଭିଯୋଗ ପରେ ବ୍ଲୁ-ଟିକ୍ ଫେରାଇଛି, ସେନେଇ କୌଣସି ସ୍ପଷ୍ଟ ସୂଚନା ମିଳିନାହିଁ ।

ତେବେ ଜାମ୍ମୁ କାଶ୍ମୀରର ପୂର୍ବ ମୁଖ୍ୟମନ୍ତ୍ରୀ ଉମର ଅବଦୁଲ୍ଲାଙ୍କ ଆକାଉଣ୍ଟକୁ ଟ୍ୱିଟର ବ୍ଲୁ-ଟିକ୍ ଫେରିଛି । ତାଙ୍କ କହିବା ମୁତାବକ ସେ ଏଥିପାଇଁ କୌଣସି ଟଙ୍କା ଦେଇ ନାହାଁନ୍ତି । ଅନ୍ୟପଟେ ନୋବେଲ ପୁରସ୍କାର ବିଜୟୀ ମଲାଲା ୟୁସୁଫଜଇ ମଧ୍ୟ ଟ୍ୱିଟର ବ୍ଲୁ-ଟିକ୍ ମିଳିବା ନେଇ ଖୁସି ଜାହିର କରିଛନ୍ତି । ତେଣୁ ପୁଣିଥରେ କମ୍ପାନୀ ବଡ ବଡ ସେଲିବ୍ରିଟିଙ୍କୁ ବ୍ଲୁ-ଟିକ୍ ଫେରାଇଥିବା ଚର୍ଚ୍ଚା ହେଉଛି ।

ସେହିପରି ଅଭିନେତ୍ରୀ ପ୍ରିୟଙ୍କା ଚୋପ୍ରା ଜୋନାସଙ୍କ ବର୍ତ୍ତମାନ ବ୍ଲୁ ଟିକ ଫେରିଆସିଛି । ହେଲେ ଏପରି ଲାଗୁଛି ଯେ, ସେ ଏଥିପାଇଁ ଟ୍ୱିଟର ବ୍ଲୁ ସବସ୍କ୍ରିପସନ ନେଇ ନାହାନ୍ତି । ଏହା ଆସିବା ପରେ ପ୍ରିୟଙ୍କା ଚୋପ୍ରା ନିଜ ଟ୍ୱିଟର ଆକାଉଣ୍ଟରେ ଲେଖିଛନ୍ତି ଯେ, ' ମୋତେ ଏ ସବୁ ଜଣା ନଥିଲା ହେଲେ ମୋର ବ୍ଲୁ ଟିକ ମନକୁ ଆସିଯାଇଛି । ମୁଁ ବର୍ତ୍ତମାନ ପୁନଶ୍ଚ ପ୍ରିୟଙ୍କା ହୋଇଯାଇଛି ।' ସୁପରଷ୍ଟାର ସଲମାନ ଖାନ ଏବଂ ଶାହାରୁଖ ଖାନଙ୍କ ମଧ୍ୟ ବ୍ଲୁ ଟିକ ଆସିଯାଇଛି ।

ସୂଚନାଥାଉ କି, ଟ୍ୱିଟର ପ୍ରଥମେ ଆମେରିକା, କାନାଡା, ବ୍ରିଟେନ, ନ୍ୟୁଜିଲାଣ୍ଡ ଏବଂ ଅଷ୍ଟ୍ରେଲିଆରେ ଦେୟଯୁକ୍ତ ବ୍ଲୁ ଟିକ୍ ସେବା ଆରମ୍ଭ କରିଥିଲା । ଏହା ପରେ ଭାରତର ନାମ ମଧ୍ୟ ଏହି ତାଲିକାରେ ଅନ୍ତର୍ଭୁକ୍ତ ହୋଇଛି ।

ଭାରତରେ ବ୍ଲୁ ସବ୍‌ସ୍କ୍ରିପସନର ମୂଲ୍ୟ ଆଇଫୋନ୍ ଏବଂ ଆଣ୍ଡ୍ରଏଡ୍ ସ୍ମାର୍ଟଫୋନ୍ ପାଇଁ ମାସକୁ ୯୦୦ ଟଙ୍କା ରହିଛି । ସେହିପରି ଟ୍ୱିଟର୍‌ ୱେବସାଇଟରେ ମୂଲ୍ୟ ମାସକୁ ୬୫୦ ଟଙ୍କା ରହିଛି । ୟୁଜରମାନେ ଏହାର ବାର୍ଷିକ ସଦସ୍ୟତା ମଧ୍ୟ ନେଇ ପାରିବେ । ବାର୍ଷିକ ଏହାର ମୂଲ୍ୟ ଟିକେ ଶସ୍ତା ହୋଇଥାଏ ।

Published On April 23, 2023