ଇନଷ୍ଟା-ହ୍ୱାଟ୍ସଆପ୍ ସହ ସୋସିଆଲ ମିଡିଆ ଆପ୍ସ ଉପରେ ପ୍ରତିବନ୍ଧକ ଲଗାଇଲା ବାଂଲାଦେଶ

ବାଂଲାଦେଶ ସୋସିଆଲ ମିଡିଆ ଆପ୍ସ ଗୁଡ଼ିକୁ କରାଯାଇଛି ବ୍ୟାନ । ବାଂଲାଦେଶରେ ଲୋକପ୍ରିୟ ସୋସିଆଲ ମିଡିଆ ଆପ୍ସ । ଇନଷ୍ଟାଗ୍ରାମ, ଫେସବୁକ, ଟିକଟକ୍ ଏବଂ ୟୁଟ୍ୟୁବକୁ ସାମୟିକ ଭାବେ ପ୍ରତିବନ୍ଧକ ଲଗାଯାଇଛି । ଏହି ନିଷ୍ପତ୍ତି ଏପରି ଏକ ସମୟରେ ଆସିଛି ଯେତେବେଳେ ସଂରକ୍ଷଣ ପ୍ରସଙ୍ଗରେ ବାଂଲାଦେଶରେ ପୁଣିଥରେ ବିରୋଧ ଆରମ୍ଭ ହୋଇଛି ।

ଏହି ସୋସିଆଲ ମିଡିଆ ଆପ ଉପରେ ଲଗାଯାଇଥିବା ପ୍ରତିବନ୍ଧକ ସମ୍ପର୍କରେ ବାଂଲାଦେଶ ସରକାରଙ୍କ ତରଫରୁ କୌଣସି ଅଫିସିଆଲ୍ ବିବୃତ୍ତି ଆସିନାହିଁ । କିନ୍ତୁ ଟାଇମ୍ସ ଅଫ୍ ଇଣ୍ଡିଆ ଏବଂ ଗ୍ଲୋବାଲ୍ ଆଇଜ୍ ସେମାନଙ୍କ ରିପୋର୍ଟରେ ସୋସିଆଲ୍ ମିଡିଆ ନିଷେଧ ବିଷୟରେ ସୂଚନା ଦେଇଛନ୍ତି ।

ଟାଇମ୍ସ ଅଫ୍ ଇଣ୍ଡିଆର ରିପୋର୍ଟ ଅନୁଯାୟୀ ବାଂଲାଦେଶ ସରକାର ଇନଷ୍ଟାଗ୍ରାମ, ଟିକଟକ୍‌, ୟୁଟ୍ୟୁବ୍ ଏବଂ ହ୍ୱାଟସ୍ ଆପ୍ ଭଳି ଲୋକପ୍ରିୟ ସୋସିଆଲ୍ ମିଡିଆ ଆପ୍ ବ୍ୟବହାରକୁ ସାମୟିକ ଭାବେ ବନ୍ଦ କରିଛନ୍ତି । ଏହାପୂର୍ବରୁ ଶୁକ୍ରବାର ଦିନ ଏହି ନିଷେଧାଦେଶ ବିଷୟରେ ଗ୍ଲୋବାଲ୍ ଆଇଜ୍ ନ୍ୟୁଜ୍ ଏହାର ଅଫିସିଆଲ୍ ଏକ୍ସ ଆକାଉଣ୍ଟ ମାଧ୍ୟମରେ ଦେଇଥିଲା ।

ଗ୍ଲୋବାଲ ଆଇଜ ରିପୋର୍ଟରେ କୁହାଯାଇଛି ଯେ ଶୁକ୍ରବାର ଠାରୁ ସାରା ଦେଶରେ ସୋସିଆଲ ମିଡିଆ ସାଇଟ ଉପରେ ଅସ୍ଥାୟୀ ପ୍ରତିବନ୍ଧକ ଲଗାଯାଇଛି । ସରକାର ମଧ୍ୟାହ୍ନ ୧୨ ଟା ପରେ ମେଟା ପ୍ଲାଟଫର୍ମର ନେଟୱାର୍କକୁ ସୀମିତ ରଖିଛନ୍ତି ଏବଂ ଇଣ୍ଟରନେଟ୍ ସ୍ପିଡ୍ ମଧ୍ୟ ମନ୍ଥର ହୋଇଛି ଯାହା ଦ୍ୱାରା ଭିପିଏନ୍ ବ୍ୟବହାର କରି ସୋସିଆଲ୍ ମିଡିଆ ମଧ୍ୟ ବ୍ୟବହାର ହୋଇପାରିବ ନାହିଁ । ବାଂଲାଦେଶରେ ଶୁକ୍ରବାର (୨ ଅଗଷ୍ଟ) ପ୍ରଧାନମନ୍ତ୍ରୀ ଶେଖ ହସିନା ଏବଂ ତାଙ୍କ ସରକାରଙ୍କ ବିରୋଧରେ ପୁଣିଥରେ ବିରୋଧ ଆରମ୍ଭ ହୋଇଥିଲା ।

ଏହାପୂର୍ବରୁ ଗତ ମାସରେ ଏହି ପ୍ରଦର୍ଶନ ହୋଇଥିଲା, ଯାହା ପରେ କର୍ଫ୍ୟୁ ଲାଗୁ କରାଯାଇଥିଲା । ଗତ ମାସରେ ମଧ୍ୟ ଇନଷ୍ଟାଗ୍ରାମ ଏବଂ ଫେସବୁକ୍ ଉପରେ ପ୍ରତିବନ୍ଧକ ଲଗାଯାଇଥିଲା ଏବଂ ଇଣ୍ଟରନେଟ୍ ଏବଂ ସୋସିଆଲ୍ ସାଇଟ୍ ଉପରେ ପ୍ରତିବନ୍ଧକ ଲଗାଇବାକୁ ନିଷ୍ପତ୍ତି ନିଆଯାଇଥିଲା । ପରେ, ସଂରକ୍ଷଣ କୋଟା ଉପରେ ସୁପ୍ରିମକୋର୍ଟଙ୍କ ନିଷ୍ପତ୍ତି ପରେ ମାମଲା ଟିକେ ଶାନ୍ତ ହୋଇଥିଲା କିନ୍ତୁ ପୁଣିଥରେ ଦେଶରେ ବିରୋଧ ଆରମ୍ଭ ହୋଇଛି ।