'ବିଗ୍ ବସ୍'ରୁ ବାହାରିବେ କି ସାଜିଦ ଖାନ !

Updated: Friday, October 14, 2022, 17:07 [IST]

Sajid Khan Controversy: ଲୋକପ୍ରିୟ ଟିଭି ଶୋ' 'ବିଗ୍ ବସ୍'ର ୧୬ ତମ ସିଜନ୍ ଆଜିକାଲି ବେଶ୍ ଚର୍ଚ୍ଚାରେ ଅଛି । ଗୋଟିଏ ପଟେ ଘରେ ଥିବା ସମସ୍ତ ପ୍ରତିଯୋଗୀଙ୍କ ମଧ୍ୟରେ ଯୁଦ୍ଧ ଚାଲିଥିବା ବେଳେ ଅନ୍ୟ ପଟେ ସାଜିଦ ଖାନଙ୍କ ପାଇଁ ନିର୍ମାତା ଏବଂ ସଲମାନ ଖାନଙ୍କର ଚିନ୍ତା ବଢିଯାଇଛି । ସୋସିଆଲ ମିଡିଆରେ ଏବେ ସଲମାନ ଓ ଶୋ'ନିର୍ମାତାଙ୍କୁ ସମାଲୋଚନା କରାଯାଉଛି । ଅନେକ ବିବାଦିୟ ପ୍ରଶ୍ନ ମଧ୍ୟ ପଚରା ଯାଉଛି । ସାଜିଦ ଖାନଙ୍କ ବିରୋଧରେ ଅନେକ ଅଭିନେତ୍ରୀ ଯୌନ ନିର୍ଯାତନା ଅଭିଯୋଗ ଆଣିଛନ୍ତି । ଏଭଳି ପରିସ୍ଥିତିରେ ସମସ୍ତଙ୍କର କେବଳ ଗୋଟେ ହିଁ ପ୍ରଶ୍ନ ଏତେ ଭୁଲ କରିବା ସତ୍ୱେ ଏପରି ବ୍ୟକ୍ତିଙ୍କୁ 'ବିଗ୍ ବସ୍' ପରି ଶୋ'ରେ କିପରି ସ୍ଥାନ ମିଳିଲା ।

ରିପୋର୍ଟ ଅନୁସାରେ, ସାଜିଦ ଖାନଙ୍କୁ ନେଇ ବଢୁଥିବା ବିବାଦକୁ ଦେଖି ତାଙ୍କୁ ଖୁବ ଶିଘ୍ର ଘରୁ ବାହାର କରିଦିଆଯାଇ ପାରେ । ଏହା ମଧ୍ୟ ଆଲୋଚନା ହେଉଛି ଯେ ସଲମାନ ଖାନ ଓ ଫରାହ ଖାନଙ୍କ ଅନୁରୋଧ କ୍ରମେ ସାଜିଦଙ୍କୁ ବିଗ୍ ବସ୍‌ରେ ସ୍ଥାନ ମିଳିଛି । ଯାହାଫଳରେ ସେ ପୁଣିଥରେ ନିଜ କ୍ୟାରିୟର ଆରମ୍ଭ କରିପାରିବେ, କିନ୍ତୁ ଏହି କାରଣରୁ ସେ ଅସୁବିଧାର ସମ୍ମୁଖୀନ ହେଉଛନ୍ତି।

'ବିଗ୍ ବସ୍'ରୁ ବାହାରିବେ କି ସାଜିଦ ଖାନ!
ଇଟାଇମ୍ସ'ର ରିପୋର୍ଟ ଅନୁଯାୟୀ, ସଲମାନ ଖାନ ସାଜିଦ ଖାନଙ୍କୁ ସୋ'ରୁ ବହିଷ୍କାର କରାଯାଉଥିବା ଦାବିକୁ ସ୍ୱୀକାର କରିଛନ୍ତି । ଗତ କିଛି ଦିନ ହେବ ସଲମାନ ଖାନଙ୍କ ପାଇଁ ପରିସ୍ଥିତି କଷ୍ଟସାଧ୍ୟ ହୋଇପଡିଛି । ଫରହା ଖାନଙ୍କ ସହ ସଲମାନଙ୍କର ଭଲ ସମ୍ପର୍କ ଥିବା କାରଣରୁ ସେ ଶୋ'ରେ ସାଜିଦଙ୍କୁ ନେଇଥିଲେ । ହେଲେ ସେ ଜାଣି ନଥିଲେ ଯେ, ଏହି ମାମଲାକୁ ନେଇ ଏତେ ବିବାଦ ଦେଖାଦେବ ବୋଲି । ଏଭଳି ପରିସ୍ଥିତିରେ ସଲମାନ ଖାନଙ୍କୁ ବାଧ୍ୟ ହୋଇ ଏହି ନିଷ୍ପତ୍ତି ନେବାକୁ ପଡ଼ିପାରେ । ସେହିପରି କିଛି ଗଣମାଧ୍ୟମ ରିପୋର୍ଟ ଅନୁସାରେ ଏହି ଖବର ପଛରେ କୌଣସି ସତ୍ୟତା ନାହିଁ । ଏହା କେବଳ ଏକ ଗୁଜବ ବୋଲି ଦାବି କରାଯାଉଛି ।