ସାଜିଦ ଖାନଙ୍କୁ ନେଇ ବିବାଦ: 'ବିଗ୍ ବସ'ରୁ ବାହାର କରିବା ପାଇଁ ମନ୍ତ୍ରୀଙ୍କୁ ଚିଠି, ମହିଳା ଆୟୋଗ ଅଧ୍ୟକ୍ଷାଙ୍କୁ ଦୁଷ୍କର୍ମ ଧମକ

Updated: Wednesday, October 12, 2022, 16:35 [IST]

ମୁମ୍ବାଇ: ଆରମ୍ଭ ହୋଇଯାଇଛି ପ୍ରସିଦ୍ଧ ଟେଲିଭିଜନ ଶୋ' 'ବିଗ୍ ବସ' । ବିବାଦରେ ପ୍ରତିଯୋଗୀ ସାଜିଥିବା ଫିଲ୍ମ ନିର୍ମାତା ସାଜିଦ ଖାନ । 'ବିଗ୍ ବସ'ରୁ ବାହାର କରିବା ପାଇଁ କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରୀ ଅନୁରାଗ ଠାକୁରଙ୍କୁ ଚିଠି ଲେଖିଲେ ଦିଲ୍ଲୀ ମହିଳା କମିଶନ ଅଧ୍ୟକ୍ଷ ସ୍ୱାତୀ ମାଲିୱାଲ । ଯାହା ପରେ ତାଙ୍କୁ ଦୁଷ୍କର୍ମ ଧମକ ଆସିବା ଆରମ୍ଭ ହୋଇଯାଇଛି । ଏ ନେଇ ସେ ନିଜ ସୋସିଆଲ ମିଡିଆରେ ସୂଚନା ଦେଇଛନ୍ତି ।

ମିଠୁ ଅଭିଯାନ ସମୟରେ ଫିଲ୍ମ ନିର୍ମାତା ସାଜିଦ ଖାନ ବିରୋଧରେ ଏକାଧିକ ମହିଳା କାଷ୍ଟି କାଉଚ ପରି ଅଭିଯୋଗ ଆଣିଥିଲେ । ଯାହାର ଅନେକ ପ୍ରମାଣ ଏବେ ସୋସିଆଲ ମିଡିଆରେ ଘୁରି ବୁଲୁଛି । ତାଙ୍କ ନାଁରେ ଯୌନ ନିର୍ଯ୍ୟାତନା ଭଳି ଅଭିଯୋଗ ହେବା ସତ୍ୱେ ତାଙ୍କୁ କିପରି ବିଗ ବସ ପରି ଶୋ'ରେ ସ୍ଥାନ ମିଳିଲା ସେ ନେଇ ଏବେ ଅନେକ ପ୍ରଶ୍ନ କରୁଛନ୍ତି ।

ସାଜିଦ ଖାନଙ୍କୁ ବିରୋଧ କରି ସ୍ୱାତୀ ମାଲିୱାଲ କେନ୍ଦ୍ରମନ୍ତ୍ରୀ ଅନୁରାଗ ଠାକୁରଙ୍କୁ ଚିଠି ଲେଖି ତାଙ୍କୁ ଶୋ'ରୁ କାଢିବା ପାଇଁ ଦାବି କରିଛନ୍ତି । ନିଜ ଚିଠିରେ ସେ ଲେଖିଛନ୍ତି ଯେ 'ସାଜିଦ ଖାନଙ୍କ ବିରୋଧରେ ୧୦ ଜଣ ମହିଳା ମିଠୁ ଅଭିଯାନ ବେଳେ ଯୌନ ନିର୍ଯାତନା ଅଭିଯୋଗ ଆଣିଥିଲେ । ତାଙ୍କ ମାନସିକତା ବିଷୟରେ ସମସ୍ତ ଅବଗତ । ଏହା ସତ୍ୱେ ତାଙ୍କୁ ଏପରି ଏକ ବଡ ରିଆଲିଟି ଶୋ'ରେ ସ୍ଥାନ ଦିଆଯାଇଛି । ଏହା ସଂପୂର୍ଣ୍ଣ ଭୁଲ । ତାଙ୍କୁ ତୁରନ୍ତୁ ଶୋ'ରୁ ବିଦା କରାଯାଉ' । ଏପରି ଖବର ପ୍ରକାଶ ପାଇବା ପରେ ଏବେ ଇନଷ୍ଟାଗ୍ରାମରେ ସ୍ୱାତୀ ମାଲିୱାଲଙ୍କୁ ବିଭିନ୍ନ ଏକାଉଣ୍ଟରୁ ଦୁଷ୍କର୍ମ ଧମକ ଆସିବା ଆରମ୍ଭ ହୋଇଯାଇଛି । ଯାହାର ସ୍କ୍ରିନସର୍ଟ ମଧ୍ୟ ସେ ସେୟାର କରିଛନ୍ତି । ଏନେଇ ସେ ଦିଲ୍ଲୀ ପୋଲିସରେ ଅଭିଯୋଗ ମଧ୍ୟ କରିସାରିଛନ୍ତି ।

साजिद खान के ख़िलाफ़ 10 महिलाओं ने #MeToo मूव्मेंट के दौरान यौन शोषण के आरोप लगाए थे। ये सभी कम्प्लेंट साजिद की घिनौनी मानसिकता दिखाती है। अब ऐसे आदमी को Bigg Boss में जगह दी गयी है जो कि पूरी तरह ग़लत है। मैंने @ianuragthakur जी को पत्र लिखा है की साजिद खान को इस शो से हटवाएँ! pic.twitter.com/4ao9elyvkk
— Swati Maliwal (@SwatiJaiHind) October 10, 2022

ସୂଚନାଥାଉ ଯେ '୨୦୧୮ରେ ମିଠୁ ଅଭିଯାନ ବେଳେ ଏକାଧିକ ମହିଳା ସାଜିଦ ଖାନଙ୍କ ବିରୋଧରେ କାଷ୍ଟିଂ କାଉଚ ଭଳି ଅଭିଯୋଗ ଆଣିଥିଲେ । ଫିଲ୍ମ ନିର୍ମାତାଙ୍କ ବିରୋଧରେ ପ୍ରାୟ ୧୦ରୁ ଅଧିକ ମହିଳା ଯୌନ ନିର୍ଯାତନା ଅଭିଯୋଗ ଆଣିବା ପରେ ତାଙ୍କୁ ଏକ ବର୍ଷ ପାଇଁ ନିଳମ୍ବିତ କରିଥିଲା ଆଇଏଫଟିଡିଏ । ଯେଉଁଥି ପାଇଁ ତାଙ୍କ ହାତରୁ ହାଉସ ଫୁଲ ପରି ଫିଲ୍ମର ଦାଇତ୍ୱ ମଧ୍ୟ ଛଡାଇ ନିଆଯାଇଥିଲା ।