ପୁଣି ପଦାରେ ପଡିଲା ବଡ ଘର ଗୁମର କଥା: ଅଭିନେତ୍ରୀ ବର୍ଷାଙ୍କୁ ନେଇ ଥାନାର ଦ୍ୱାରସ୍ଥ ହେଲେ ଅନୁଭବଙ୍କ ମା'

ବର୍ଷାଙ୍କୁ ନେଇ ଥାନାରେ ଅଭିଯୋଗ କଲେ ଅନୁଭବଙ୍କ ମା'। ଘର ମରାମତି ପାଇଁ ବର୍ଷାଙ୍କୁ ବାପ ଘରକୁ ଯିବାକୁ କହୁଥିବା ବେଳେ କୌଣସି କାରଣ ନ ଦର୍ଶାଇ ବର୍ଷା ଘର ଛାଡୁ ନଥିବା ଅଭିଯୋଗ କରିଛନ୍ତି ଅନୁଭବଙ୍କ ମା'।

କଟକ : ଅନୁଭବ ଓ ବର୍ଷାକୁ ନେଇ ବିବାଦ ଥମିବାର ନା ଧରୁ ନାହିଁ । ଦୁଇ ଜଣଙ୍କ ମଧ୍ୟରେ ବିବାଦ ଚାଲିଥିବା ବେଳେ ଏଥିରେ ଆଜି ଯୋଡି ହୋଇଛନ୍ତି ଅନୁଭବଙ୍କ ମା' ମଧୁସ୍ମିତା ମହାନ୍ତି । ବର୍ଷାଙ୍କୁ ନେଇ ଅନୁଭବଙ୍କ ମା' ଥାନାର ଦ୍ୱାରସ୍ଥ ହୋଇଛନ୍ତି । ପୁରୁଣା ଘରର ମରାମତି ପାଇଁ ସେ ବର୍ଷାଙ୍କୁ ଦଶ ଦିନ ପାଇଁ ବାପ ଘରକୁ ଯିବାକୁ କହୁଥିବା ବେଳେ ସେ ଘର ଛାଡୁ ନଥିବା ଅଭିଯୋଗ କରିଛନ୍ତି । ଏନେଇ ପୁରୀଘାଟ ଥାନାରେ ଅନୁଭବଙ୍କ ମା' ମଧୁସ୍ମିତା ଲିଖିତ ଅଭିଯୋଗ କରିଛନ୍ତି ।

ତାଙ୍କ ଅଭିଯୋଗ ଅନୁସାରେ କଟକର ଚୌଧୁରୀ ବଜାର ନନ୍ଦିସାହିରେ ଥିବା ଘର 60 ବର୍ଷ ତଳର । କିଛିଦିନ ତଳେ ପାଇଖାନା ଟାଙ୍କିରେ ସମସ୍ୟା ଦେଖାଦେବାରୁ ଏହାର ମରାମତି ପାଇଁ ସେ ଯୋଗାଯୋଗ କରିଥିଲେ । ମିସ୍ତ୍ରୀ ମରାମତି ପାଇଁ 10 ଦିନ ଲାଗିବ ବୋଲି କହିଥିଲେ । ତେଣୁ ବର୍ଷାଙ୍କୁ ଏହି 10 ଦିନ ଲାଗି ଘର ଛାଡି ବକ୍ସିବଜାର ସ୍ଥିତ ତାଙ୍କ ବାପଘରକୁ ଯିବାକୁ ବୋହୂ ବର୍ଷାଙ୍କୁ ସେ ଅନୁରୋଧ କରିଥିଲେ । ତେବେ କୌଣସି କାରଣ ନ ଦର୍ଶାଇ ବର୍ଷା ଘର ଛାଡୁ ନଥିବା ଅନୁଭବଙ୍କ ମା' ମଧୁସ୍ମିତା ତାଙ୍କ ଅଭିଯୋଗରେ ଦର୍ଶାଇଛନ୍ତି । ଆହୁରି ମଧ୍ୟ ଏହି କାରଣରୁ ସେ, ତାଙ୍କ ସ୍ୱାମୀ ଓ ଘରର ଅନ୍ୟ ସଦସ୍ୟ ସମସ୍ୟା ଭୋଗୁଛନ୍ତି । ଏହିଥିପାଇଁ ଥାନା କର୍ତ୍ତୃପକ୍ଷ ଘରକୁ ଆସି ସମସ୍ତ ତଥ୍ୟ ଦେଖି ପଦକ୍ଷେପ ନେବାକୁ ଅନୁଭବଙ୍କ ମା' ପୁଲିସକୁ ଅନୁରୋଧ କରିଛନ୍ତି । ବଡ ଘରର ଏହି ଗୁମର କଥାକୁ ନେଇ ଏବେ ଚାରି ଆଡେ ଚର୍ଚ୍ଚା ଯୋର୍ ଧରିଛି ।

English summary

Mp Anubhavs Mother Went to Police Station Against Actress Barsha