ନିର୍ବାଚନ ଲଢିବାକୁ ମନ ବଳାଇଛନ୍ତି ବିବାଦୀୟ ବଲିଉଡ୍ କୁଇନ୍ କଙ୍ଗନା, ଏହି ଆସନରୁ ଲଢିବାକୁ ଇଛା

Updated: Saturday, October 29, 2022, 17:35 [IST]

ମୁମ୍ବାଇ: ରାଜନୀତିରେ ପାଦ ଦେଇ ପାରନ୍ତି ବଲିଉଡ୍ କୁଇନ୍ । ପ୍ରଥମ ଥର ଅଭିନେତ୍ରୀ କଙ୍ଗନା ରଣାୱତ ନିର୍ବାଚନ ଲଢ଼ିବାକୁ ଇଚ୍ଛା ପ୍ରକାଶ କରିଛନ୍ତି । ଯଦି ଜନତା ଚାହଁନ୍ତି ସେ ନିଶ୍ଚୟ ରାଜନୈତିକ ମଇଦାନରେ ଓଲ୍ଲେଇବେ । ହିମାଚଳ ପ୍ରଦେଶର ମଣ୍ଡି ଲୋକସଭା ଆସନରୁ ୨୦୨୪ ରେ ହେବାକୁ ଥିବା ସାଧାରଣ ନିର୍ବାଚନରେ ସେ ଭାଗ ନେବାକୁ ଚାହୁଁଛନ୍ତି ଏନେଇ ଏକ ଜାତୀୟ ଗଣମାଧ୍ୟମକୁ ସାକ୍ଷାତକାରରେ ସୂଚନା ଦେଇଛନ୍ତି ନିଜେ କଙ୍ଗନା ।

ସୂଚନା ଅନୁସାରେ ନିକଟରେ ଜାତୀୟ ଗଣମାଧ୍ୟମ ଇଣ୍ଡିଆ ଟୁଡେରେ ଆୟୋଜିତ ଏକ କାର୍ଯ୍ୟକ୍ରମରେ ଯୋଗ ଦେଇଥିଲେ କଙ୍ଗନା ରଣାୱତ । ଯେଉଁଠି ତାଙ୍କୁ ରାଜନୀତିରେ ଯୋଗ ଦେବାକୁ ପ୍ରଶ୍ନ କରାଯାଇଥିଲା । ଯାହାର ବେସ୍ ର୍ନିଦ୍ୱନ୍ଦ ଭାବେ ଉତ୍ତର ଦେଇଥିଲେ କଙ୍ଗନା । ସେ କହିଥିଲେ ଯେ' ଯେଉଁଭଳି ପରିସ୍ଥିତି ହେବ । ଯେମିତି ସରକାର ଚାହିଁବେ, ମୁଁ ମୋର ସମସ୍ତ ସହଯୋଗ ଦେବା ପାଇଁ ଚେଷ୍ଟା କରିବି। ଯଦି ହିମାଚଳ ଜନତା ମୋତେ ସେବା କରିବାର ମୌକା ଦେବେ ତେବେ ଏହା ମୋ ପାଇଁ ସୈଭାଗ୍ୟର କଥା ହେବ, ମୁଁ ନିଶ୍ଚୟ ରାଜନୀତିରେ ପାଦ ଦେବି ।

ସେହିପରି ଏହି କାର୍ଯ୍ୟକ୍ରମରେ ଅଭିନେତ୍ରୀ କଙ୍ଗନା ପ୍ରଧାନମନ୍ତ୍ରୀ ମୋଦୀଙ୍କର ଖୁବ୍ ପ୍ରଶଂସା କରିଥିଲେ । ପ୍ରଧାନମନ୍ତ୍ରୀ ମୋଦୀଙ୍କୁ ଜଣେ ମହାପୁରୁଷ ବୋଲି କହିଥିଲେ କଙ୍ଗନା । ହେଲେ ରାହୁଲ ଗାନ୍ଧୀଙ୍କୁ କଟାକ୍ଷ କରି ସେ କହିଛନ୍ତି ଯେ, ରାହୁଲ ଜୀ ତାଙ୍କ ସ୍ତରରେ ଚେଷ୍ଟା କରୁଛନ୍ତି । କିନ୍ତୁ ମୋଦୀ ଜୀଙ୍କ ପାଇଁ ଦୁଃଖର କଥା ହେଲା ଯେ ରାହୁଲ ଜୀ ତାଙ୍କର ବିରୋଧୀ । ଆଉ ରାହୁଲଙ୍କ ପାଇଁ ଦୁଃଖର କଥା ହେଲା ଯେ ମୋଦୀ ଜୀ ତାଙ୍କ ବିରୋଧୀ । ସେପଟରେ କେଜ୍ରିୱାଲଙ୍କୁ ଟାର୍ଗେଟ୍ କରି କଙ୍ଗନା କହିଛନ୍ତି ଯେ ଆମ ଆଦମୀ ପାର୍ଟିର ମିଥ୍ୟା ପ୍ରତିଶ୍ରୁତିରେ ହିମାଚଳବାସୀ ଭାସିଯିବେ ନାହିଁ । ହିମାଚଳର ଲୋକଙ୍କ ପାଖରେ ନିଜର ସୌର ଶକ୍ତି ରହିଛି । ତେଣୁ ସେଠାରେ ମାଗଣା ବିଜୁଳି କଥା କହିଲେ ଲୋକେ ଶୁଣିବେ ନାହିଁ ।