Bollywood Actress'ଙ୍କ ସହ ଠକେଇ ଏବଂ ବଳାତ୍କାର ମାମଲା, ଥାଣେ ପୋଲିସ ଷ୍ଟେସନରେ FIR ରୁଜୁ

Bollywood Actress Rape Case: ଜଣେ ବଲିଉଡ ଅଭିନେତ୍ରୀଙ୍କ ଅଭିଯୋଗ ପରେ ଥାଣେ ପୋଲିସ ଜଣେ ବ୍ୟବସାୟୀ ଏବଂ ତାଙ୍କ ସହଯୋଗୀଙ୍କ ବିରୋଧରେ ବଳାତ୍କାର ଏବଂ ଠକେଇ ମାମଲା ରୁଜୁ କରିଛି। ବମ୍ବେ ହାଇକୋର୍ଟରେ ଶୁଣାଣି ସମୟରେ ପୋଲିସ କାର୍ଯ୍ୟାନୁଷ୍ଠାନର ପ୍ରତିଶ୍ରୁତି ଦେବା ପରେ ଏଫଆଇଆର ମଧ୍ୟ ରୁଜୁ ହୋଇଛି । ତିନି ମାସ ଧରି ତାଙ୍କ ଅଭିଯୋଗ ଉପରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନ ହେବାରୁ ଅଭିନେତ୍ରୀ କୋର୍ଟଙ୍କ ଦ୍ୱାରସ୍ଥ ହୋଇଥିଲେ।

ଆବେଦନରେ ଦାବି କରାଯାଇଛି ଯେ, ଅଭିନେତ୍ରୀଙ୍କ ଦେଖା ଜୁବିଲାଣ୍ଟ ଫୁଡୱାର୍କସର ଅଧ୍ୟକ୍ଷ ଶ୍ୟାମ ସୁନ୍ଦରଙ୍କ ସହ ଏକ ହୋଟେଲରେ ହୋଇଥିଲା । ସେ ଅଭିନେତ୍ରୀଙ୍କୁ ସିଙ୍ଗାପୁରକୁ ଡକାଇଥିଲେ, ଯେଉଁଠି ୧୮ ମଇ ୨୦୨୩ରେ ତାଙ୍କୁ ନିଶା ଦିଆଯାଇଥିଲା ଏବଂ ପରେ ବଳାତ୍କାର କରାଯାଇଥିଲା। ଏହି ସମୟରେ ତାଙ୍କ ସହଯୋଗୀ ପୂଜା ସିଂହ ଘଟଣାର ଭିଡିଓ ରେକର୍ଡିଂ କରିଥିଲେ। ଅଭିଯୋଗ ହୋଇଛି ଯେ ଏହି ଶୋଷଣ ତିନି ଦିନ ଧରି ଜାରି ରହିଥିଲା।

ଅଭିଯୋଗକାରୀ ଦାବି କରିଛନ୍ତି ଯେ, ଅଭିଯୁକ୍ତ ତାଙ୍କୁ ଭିଡିଓ ଦେଖାଇ ବ୍ଲାକମେଲ୍ କରିଛନ୍ତି ଏବଂ ମୁମ୍ବାଇ ଏବଂ ଦିଲ୍ଲୀର ହୋଟେଲରେ ଅନେକ ଥର ତାଙ୍କୁ ଭେଟିବାକୁ ବାଧ୍ୟ କରିଛନ୍ତି । ଏହା ସହିତ, ସିଂହ ଅଭିନେତ୍ରୀଙ୍କୁ କମ୍ପାନୀରେ ନିର୍ଦ୍ଦେଶକ କରି ତାଙ୍କ ଆକାଉଣ୍ଟରେ ୫୦ କୋଟି ଟଙ୍କା ନିବେଶ କରିବାକୁ ପ୍ରତିଶ୍ରୁତି ଦେଇଥିଲେ, କିନ୍ତୁ ୧୮ ମାର୍ଚ୍ଚ ୨୦୨୪ ପର୍ଯ୍ୟନ୍ତ କେବଳ ୯.୪୪ କୋଟି ଟଙ୍କା ନିବେଶ ହୋଇଥିଲା, ଯାହା ତାଙ୍କ ଅଜାଣତରେ ଅଭିନେତ୍ରୀଙ୍କ ଆକାଉଣ୍ଟକୁ ସ୍ଥାନାନ୍ତର କରାଯାଇଥିଲା।

ଅଭିନେତ୍ରୀ ଜଣକ ଦାବି କରିଛନ୍ତି ଯେ ସେ ୧୧ ନଭେମ୍ବର ୨୦୨୪ରେ ଥାଣେ ପୋଲିସରେ ଅଭିଯୋଗ କରିଥିଲେ, କିନ୍ତୁ କୌଣସି କାର୍ଯ୍ୟାନୁଷ୍ଠାନ ନିଆଯାଇ ନଥିଲା। ହାଇକୋର୍ଟ ପୋଲିସକୁ ବିଳମ୍ବ ବିଷୟରେ ପ୍ରଶ୍ନ କରିଥିଲେ, ସେତେବେଳେ କୌଣସି ସନ୍ତୋଷଜନକ ଉତ୍ତର ମିଳିନଥିଲା। ଏହା ପରେ, ଥାଣେ ପୋଲିସ କମିଶନରଙ୍କୁ ଭିଡିଓ କନଫରେନ୍ସିଂ ମାଧ୍ୟମରେ ହାଜର ହେବାକୁ ନିର୍ଦ୍ଦେଶ ଦିଆଯାଇଥିଲା ବର୍ତ୍ତମାନ ଏହି ଘଟଣାର ତଦନ୍ତ ଆରମ୍ଭ ହୋଇଯାଇଛି ।