ଆଗୁଆ ଜାମିନ ପାଇଁ ହାଇକୋର୍ଟର ଦ୍ବାରସ୍ଥ ହେଲେ ଅଭିନେତା ବାବୁଶାନ

କିନ୍ତୁ ଆଜି ସଂଧ୍ୟାରେ ଅଭିନେତା ବାବୁଶାନ ମହାନ୍ତିଙ୍କୁ ଘାରିଛି ଗିରଫ ଭୟ । ସେ ଏନେଇ ହାଇକୋର୍ଟଙ୍କ ଦ୍ୱାରସ୍ଥ ହୋଇ ଆଗୁଆ ଜାମିନ ଆବେଦନ କରିଛନ୍ତି।

Published: Wednesday, July 27, 2022, 20:27 [IST]

ଭୁବନେଶ୍ବର: ପ୍ରକୃତି-ତୃପ୍ତି-ବାବୁଶାନ ବିବାଦ ଦିନକୁ ଦିନ ଜଟିଳ ହେବାରେ ଲାଗିଛି। ଚେନ୍ନାଇରୁ ଫେରିବା ପରେ ବାବୁଶାନ ନିଜ ମାଆବାପାଙ୍କ ପାଖରେ ଥିଲେ । ଅଭିନେତାଙ୍କ ମାଆ ଅପରାଜିତା ମହାନ୍ତି ଗଣମାଧ୍ୟମକୁ କହିଥିଲେ ଯେ, ପୁଅ ବର୍ତ୍ତମାନ ରେଷ୍ଟ ନେଉଛି ଆଉ ଦୁଇ ଦିନ ପରେ ଗଣମାଧ୍ୟମ ସାମନାରେ ଉତ୍ତର ରଖିବ । କିନ୍ତୁ ଆଜି ସଂଧ୍ୟାରେ ଅଭିନେତା ବାବୁଶାନ ମହାନ୍ତିଙ୍କୁ ଘାରିଛି ଗିରଫ ଭୟ । ସେ ଏନେଇ ହାଇକୋର୍ଟଙ୍କ ଦ୍ୱାରସ୍ଥ ହୋଇ ଆଗୁଆ ଜାମିନ ଆବେଦନ କରିଛନ୍ତି।

ସୂଚନା ଅନୁସାରେ, ଅଭିନେତାଙ୍କ ପତ୍ନୀ ତୃପ୍ତି ଶତପଥୀ ବାବୁଶାନଙ୍କ ନାମରେ ମାମଲା ରୁଜୁ କରିଛନ୍ତି । ଅଭିନେତାଙ୍କ ନାଁରେ ଦଫା ୪୯୮(କ), ୫୦୬ ଲାଗିଛି। ଅଭିନେତ୍ରୀ ପ୍ରକୃତି ମିଶ୍ରଙ୍କ ସହ ସମ୍ପର୍କ ରଖିଥିବା ନେଇ ବାବୁଶାନଙ୍କ ବିରୋଧରେ ପତ୍ନୀ ତୃପ୍ତି ଶତପଥୀ ଖାରବେଳନଗର ଥାନାରେ ଅଭିଯୋଗ କରିଥିଲେ। ତୃପ୍ତିଙ୍କ ଅଭିଯୋଗ ଆଧାରରେ ଉଭୟ ପ୍ରକୃତି ଓ ବାବୁଶାନଙ୍କୁ ପୋଲିସ ନୋଟିସ କରିଥିଲା । ଗତକାଲି ପ୍ରକୃତିଙ୍କୁ ପୋଲିସ ଜେରା କରିଥିବା ବେଳେ ବାବୁଶାନଙ୍କୁ ବର୍ତ୍ତମାନ ସୁଦ୍ଧା ଜେରା କରାଯାଇ ନାହିଁ । କିନ୍ତୁ ସେ ଗିରଫ ଭୟରେ ଆଗୁଆ ଜାମିନ ଆବେଦନ କରିଛନ୍ତି।

ବାବୁଶାନଙ୍କ ବିରୋଧରେ ଘରୋଇ ହିଂସା ଓ ଧମକ ଦେବା ଭଳି ଅଭିଯୋଗ ଥିବାରୁ ତାଙ୍କୁ ଜେରା ବେଳେ ପୁଲିସ ଗିରଫ ଦେବାର ଆଶଙ୍କା ରହିଛି। ତେବେ ବାବୁଶାନଙ୍କୁ କେବେ ଜେରା କରାଯିବ ? ତାଙ୍କ ବିରୋଧରେ କ'ଣ ପଦକ୍ଷେପ ନିଆଯିବ ତାହା ଜାଣିବା ପାଇଁ ଲୋକେ ଅପେକ୍ଷା କରିଛନ୍ତି ।

Published On July 27, 2022