ରଦ୍ଦ ହେଲା ଆଇସିଏସ୍ଇ ବୋର୍ଡ ଦଶମ ପରୀକ୍ଷା, ଦ୍ୱାଦଶ ପାଇଁ ଜୁନ୍ ମାସରେ ହେବ ନିଷ୍ପତ୍ତି

ନୂଆଦିଲ୍ଲୀ : ସାରା ଦେଶରେ କରୋନା ସଂକ୍ରମଣ ଭୟାବହତାକୁ ନଜରରେ ରଖି ଆଇସିଏସ୍ଇ ବୋର୍ଡ ଦଶମ ଶ୍ରେଣୀ ପରୀକ୍ଷାକୁ ବାତିଲ କରାଯାଇଛି । ଆଇସିଏସ୍ଇ ବୋର୍ଡ କହିଛି ଯେ ଦ୍ୱାଦଶ ପରୀକ୍ଷା ନେଇ ନିଷ୍ପତ୍ତି ଜୁନ୍ 2021 ରେ ନିଆଯିବ । ଦ୍ୱାଦଶ ପରୀକ୍ଷା ସମ୍ପର୍କରେ ପରିସ୍ଥିତି ଦେଖିବା ପରେ ଅଫଲାଇନ କରିବାକୁ ଚିନ୍ତା କରାଯିବ ବୋଲି ଆଇସିଏସ୍ଇ ବୋର୍ଡ କହିଛି । ଏହାପୂର୍ବରୁ ସିବିଏସ୍ଇ ବୋର୍ଡ ମଧ୍ୟ ଦଶମ ବୋର୍ଡର ପରୀକ୍ଷାକୁ ବାତିଲ କରି ଦ୍ୱାଦଶ ପରୀକ୍ଷା ନେଇ ପରେ ନିଷ୍ପତ୍ତି ନେବାକୁ କହିଥିଲେ । କରୋନାକୁ ଦୃଷ୍ଟିରେ ରଖି ଅନେକ ରାଜ୍ୟ ବୋର୍ଡ ପରୀକ୍ଷା ମଧ୍ୟ ବାତିଲ କରିଛନ୍ତି ।

ଏହା ପୂର୍ବରୁ ଆଇସିଏସ୍ଇ ବୋର୍ଡ କହିଥିଲା ​​ଯେ ଦଶମ ପରୀକ୍ଷା ଛାତ୍ରଛାତ୍ରୀଙ୍କ ପାଇଁ ଇଚ୍ଛାଧୀନ ରହିବ । ଯେଉଁ ଛାତ୍ରମାନେ ଦଶମ ଶ୍ରେଣୀ ପରୀକ୍ଷା ଦେବାକୁ ଚାହୁଁଛନ୍ତି, ସେମାନେ ପରୀକ୍ଷା ଦେଇପାରିବେ । ଅବଶିଷ୍ଟ ମୂଲ୍ୟାଙ୍କନ ପଦ୍ଧତିରୁ ବୋର୍ଡ ସେମାନଙ୍କ ପାଇଁ ଫଳାଫଳ ପ୍ରସ୍ତୁତ କରିବ । ପୂର୍ବ ବିଜ୍ଞପ୍ତିରେ ବୋର୍ଡ କହିଥିଲା ଯେଉଁ ଛାତ୍ରଛାତ୍ରୀମାନେ ଦଶମ ଶ୍ରେଣୀ ପରୀକ୍ଷା ଦେବାକୁ ଚାହୁଁନଥିବେ ସେମାନେ ପରେ ଦ୍ୱାଦଶ ଶ୍ରେଣୀର ଛାତ୍ରମାନଙ୍କ ସହିତ ପରୀକ୍ଷା ଦେଇ ପାରିବେ । ବୋର୍ଡ କହିଛି ଯେ ଦ୍ୱାଦଶ ପରୀକ୍ଷା ଉପରେ ନିଷ୍ପତ୍ତି ଜୁନ୍ ମାସରେ ନିଆଯିବ।

ICSE cancels class 10 board examinations, in the wake of #COVID19 situation. The status of exams for class 12 remains the same as the previous order - Class 12 Exam (offline) will be conducted at a later date. pic.twitter.com/59yD583ShL

— ANI (@ANI) April 20, 2021

ଏହାପୂର୍ବରୁ ICSE ବୋର୍ଡର ଦଶମ ପରୀକ୍ଷା 04 ମଇ 2021 ରୁ ଆରମ୍ଭ ହୋଇ 07 ଜୁନ୍ 2021 ପର୍ଯ୍ୟନ୍ତ ଚାଲିବ ବୋଲି କୁହାଯାଇଥିଲା । ଏଥି ସହିତ, ଦ୍ୱାଦଶ ପରୀକ୍ଷା 8 ଏପ୍ରିଲରୁ 18 ଜୁନ୍ ପର୍ଯ୍ୟନ୍ତ ହେବ ବୋଲି ବୋର୍ଡ ଘୋଷଣା କରିଥିଲା ।

ଅନ୍ୟପକ୍ଷରେ ଆଇସିଏସଇ ଅନୁବଦ୍ଧିତ ସ୍କୁଲ ଏକାଦଶ ପାଇଁ ଆଡମିଶନ ଆରମ୍ଭ କରିବାକୁ ନିଷ୍ପତ୍ତି ହୋଇଛି । ଏହାଛଡା ଅନଲାଇନ କ୍ଲାସ୍ ମଧ୍ୟ ଆରମ୍ଭ କରିବାକୁ ନିଷ୍ପତ୍ତି ହୋଇଛି । ପିଲାମାନେ ଆଇଏସସି 2023 ଶିକ୍ଷାବର୍ଷର ସିଲାବସ ପାଠପଢିବେ ।