ରୂପାନ୍ତରୀକରଣ ସ୍ୱାସ୍ଥ୍ୟସେବା ଓ ଭିତ୍ତିଭୂମି ରହିଛି ବଜେଟର ମୁଖ୍ୟ ଉଦ୍ଦେଶ୍ୟ

ରୂପାନ୍ତରୀକରଣ ସ୍ୱାସ୍ଥ୍ୟସେବା ଓ ଭିତ୍ତିଭୂମି ଏହି ବଜେଟର ମୁଖ୍ୟ ଉଦ୍ଦେଶ୍ୟ ରହିଛି ବୋଲି କହିଛନ୍ତି ଅର୍ଥମନ୍ତ୍ରୀ ।

| Updated: Monday, February 22, 2021, 18:49 [IST]

ଭୁବନେଶ୍ୱର : ଆଜି ବିଧାନସଭାରେ ଆଗତ ହୋଇଛି ଆର୍ଥିକ ବର୍ଷ 2021-22 ପାଇଁ ରାଜ୍ୟ ବଜେଟ୍ । ଅର୍ଥମନ୍ତ୍ରୀ ନିରଞ୍ଜନ ପୂଜାରୀ ମୁଖ୍ୟମନ୍ତ୍ରୀଙ୍କ ଉପସ୍ଥିତିରେ ରାଜ୍ୟ ବଜେଟ୍ ଉପସ୍ଥାପନ କରିଛନ୍ତି । ରୂପାନ୍ତରୀକରଣ ସ୍ୱାସ୍ଥ୍ୟସେବା ଓ ଭିତ୍ତିଭୂମି ଏହି ବଜେଟର ମୁଖ୍ୟ ଉଦ୍ଦେଶ୍ୟ ରହିଛି ବୋଲି କହିଛନ୍ତି ଅର୍ଥମନ୍ତ୍ରୀ ।

ନୂତନ ଓଡ଼ିଶା, ସଶକ୍ତ ଓଡ଼ିଶାର ଆଶାକୁ ପୂରଣ କରିବା ପାଇଁ ସ୍ୱାସ୍ଥ୍ୟସେବା, କୃଷି, ଶିକ୍ଷା, ଜୀବିକା, ଭିତ୍ତିଭୂମି ଏବଂ ଶିଳ୍ପ କ୍ଷେତ୍ରକୁ ପରବର୍ତ୍ତୀ ସ୍ତରକୁ ନେବା ସହ ସମାଜର ଦୁଃସ୍ଥ ବର୍ଗର ଲୋକମାନଙ୍କ ପାଇଁ ପର୍ଯ୍ୟାପ୍ତ ସୁରକ୍ଷାର ବ୍ୟବସ୍ଥା ରହିଛି ।

କଟକସ୍ଥିତ ଶ୍ରା ରାମଚନ୍ଦ୍ର ଭେଷଜ ମହାବିଦ୍ୟାଳୟକୁ ଏମ୍ସ ପ୍ଲସ ପ୍ରତିଷ୍ଠାନରେ ପରିଣତ କରି ବିଶ୍ୱ ସ୍ତରୀୟ ସ୍ୱାସ୍ଥ୍ୟସେବା ଯୋଗାଇବା ପାଇଁ ଆଗାମୀ 3 ବର୍ଷ ମଧ୍ୟରେ ପ୍ରାୟ 3 ହଜାର 500 କୋଟି ଟଙ୍କାର ବ୍ୟୟ ବରାଦ ହୋଇଛି । ଏଥିସହିତ କୃଷି ଓ ଆନୁସଙ୍ଗିକ କ୍ଷେତ୍ରରେ ରୂପାନ୍ତରଣକାରୀ ପରିବର୍ତ୍ତନ ଆଣିବା ପାଇଁ KALIA ଯୋଜନା ଅଧୀନରେ 1800 କୋଟି ଟଙ୍କା, ରାଷ୍ଟ୍ରୀୟ କୃଷି ବିକାଶ ଯୋଜନା ଅଧିନରେ 450 କୋଟି ଟଙ୍କା, ସମସ୍ତ ପ୍ରମୁଖ ନଦୀରେ ଇନ-ଷ୍ଟ୍ରିମ୍ ଷ୍ଟୋରେଜ୍ ଷ୍ଟ୍ରକ୍ଚର(IIS)ର ନିର୍ମାଣ ପାଇଁ 795 କୋଟି ଟଙ୍କା ଏବଂ କୃଷକ ମାନଙ୍କୁ କମ୍ ସୁଧରେ ଋଣ ଦେବା ପାଇଁ 819 କୋଟି ଟଙ୍କା ବ୍ୟୟ ବରାଦ କରାଯାଇଛି ।

ଏହା ବ୍ୟତୀତ ରାଜ୍ୟର ପର୍ଯ୍ୟଟନ କ୍ଷେତ୍ରକୁ ବିଶ୍ୱସ୍ତରୀୟ କରିବା ସହ ପୁରୀକୁ ବିଶ୍ୱ ଐତିହ୍ୟ ସହରରେ ପରିଣତ କରିବା ପାଇଁ ABADHA ଯୋଜନା ଅଧିନରେ 542 କୋଟି ଟଙ୍କା ବ୍ୟୟବରାଦ କରାଯାଇଛି । ସେହିପରି ଲିଙ୍ଗରାଜ ପରିପାର୍ଶ୍ୱର ସୌନ୍ଦର୍ଯ୍ୟକରଣ ଓ ଚତୁଃପାର୍ଶ୍ୱରେ ଥିବା 65 ଏକରରୁ ଉର୍ଦ୍ଧ୍ୱ ଜାଗାକୁ ପଥଚାରୀଙ୍କ ପାଇଁ ଉନ୍ମୁକ୍ତ ପାଇଁ EKAMRA ଯୋଜନା ଅଧିନରେ 200 କୋଟି ଟଙ୍କାର ବ୍ୟୟବରାଦ କରାଯାଇଛି । ପଶ୍ଚିମ ଓଡ଼ିଶାରେ ଥିବା ସମଲେଶ୍ୱରୀ ମନ୍ଦିରର ରୂପାନ୍ତରଣ ପାଇଁ SAMALEI ଯୋଜନା ଅଧିନରେ 200 କୋଟି ଟଙ୍କାର ବ୍ୟୟ ବରାଦ କରିଛନ୍ତି ରାଜ୍ୟ ସରକାର ।

ଏହା ବ୍ୟତୀତ ରାଜ୍ୟକୁ କ୍ରୀଡ଼ା କ୍ଷେତ୍ରରେ ସାରା ବିଶ୍ୱରେ ପରିଚିତ କରାଇବା ନେଇ ରାଉରକେଲାରେ 15 ଏକରରୁ ଅଧିକ ଜମିରେ ଏକ ନୀତନ ବିଶ୍ୱ ସ୍ତରୀୟ ହକି ଷ୍ଟାଡ଼ିୟମ୍ ନିର୍ମାଣ ପାଇଁ 90 କୋଟି ଟଙ୍କା ଆବଣ୍ଟନ କରାଯାଇଛି ।

ଆମକୁ ଫୋଲୋ କରନ୍ତୁ